ناس كتير في مصر بيفكروا في الاستثمار، بس أول سؤال بيجي في دماغهم: “هو لازم يكون معايا مبلغ كبير عشان أبدأ؟” الحقيقة لأ. الاستثمار مش بس لرجال الأعمال أو أصحاب رؤوس الأموال الكبيرة، لكن كمان لأي حد عايز يحافظ على فلوسه ويكبرها مع الوقت حتى لو كانت البداية بمبلغ صغير.
كمان النهاردة بقى فيه طرق كتير وسهلة تخليك تبدأ استثمارك من أول 500 جنيه أو حتى أقل. سواء في الذهب، شهادات الاستثمار، أذون الخزانة، أو التطبيقات الرقمية. وكمان في حل عملي جدًا يساعدك تحوّش وتجهّز نفسك للاستثمار من غير ما يكون عبء عليك، وهو الاشتراك في أبلكيشن ماني فيللوز Money Fellows.
في المقال ده هنتكلم عن أفضل طرق الاستثمار بمبلغ صغير في مصر، وازاي تبدأ خطوة بخطوة من غير مخاطرة كبيرة، عشان تحط أول حجر في مشوار حريتك المالية وتبني مستقبل أفضل.
طرق الاستثمار بمبلغ صغير في مصر
أهم حاجة إنك تبدأ، حتى لو بمبلغ بسيط، ومع الوقت تقدر تزوّد استثماراتك خطوة بخطوة. الفكرة مش في حجم المبلغ، لكن في الاستمرارية وطريقة استثماره صح.
ودلوقتي في مصر بقى متاح أدوات استثمار متنوعة تناسب أي ميزانية، زي إنك تبدأ من شراء ذهب بأوزان صغيرة، أو تستثمر في شهادات الادخار، ولحد المنصات الرقمية اللي بتسهل على أي شخص يبدأ بمبلغ بسيط. يعني الفرصة مُتاحة للجميع إنهم يدخلوا عالم الاستثمار من غير تعقيد. وخلينا نبدأ بشرح طرق الاستثمار المختلفة أكتر في السطور الجاية:
1. الاستثمار في الذهب
الذهب من زمان ولحد دلوقتي وهو ملجأ المصريين وقت الأزمات الاقتصادية. ومش لازم تستنى لحد ما يبقى معاك مبلغ ضخم عشان تشتري سبيكة ذهب كبيرة. دلوقتي قدامك كذا طريقة تبدأ بيها:
- سبائك ذهب صغيرة: فيه سبائك بأوزان صغيرة، بداية من ربع جرام، نصف جرام، ولحد 2.5 أو 5 جرام كأحجام متوسطة، وهتكون مناسبة جدًا كبداية.
- جنيهات ذهب: تقدر تبدأ بشراء ربع جنيه أو نصف جنيه واللي بتكون جراماتها قليلة وتخزنها، وكل شهر تزوّد حسب قدرتك.
مميزات الاستثمار في الذهب:
- بيحافظ على قيمته حتى وقت الأزمات.
- سهل البيع والشراء في أي وقت.
- ينفع كأصل للادخار طويل المدى وكمان كتحويشة قصيرة المدى.
- يعتبر استثمار آمن مقارنةً بوسائل تانية فيها مخاطرة عالية.
2. شهادات الاستثمار وأذون الخزانة الحكومية
لو بتدور على طريقة استثمار فيها أمان وعائد مضمون، شهادات الاستثمار في البنوك أو أذون الخزانة من أكتر الطرق أمان. وده بسبب:
- العائد ثابت وواضح.
- تقدر تختار المدة اللي تناسبك: 6 شهور، سنة، أو 3 سنين.
- مش محتاجة مجهود منك ولا متابعة مستمرة.
3. تطبيقات الاستثمار
دلوقتي بقى فيه تطبيقات مختلفة للاستثمار في مصر، واللي بتسمحلك تبدأ من أول 100 أو 200 جنيه. المنصات دي بتوفر لك فرصة تستثمر في أسهم أو صناديق استثمار بدون ما تحتاج تكون خبير في الاستثمار. والميزة فيها التطبيقات دي، إنك:
- بتتحكم في استثماراتك من موبايلك.
- بتتعلم الاستثمار خطوة بخطوة من الصفر.
- تقدر تبدأ بمبلغ بسيط جداً.
