في ظل الظروف الاقتصادية الحالية، اللي بتواجه أغلب الأسر المصرية، بقى الاستفادة من أوقات العروض والخصومات شيء ضروري جدًا. وخاصةً في مواسم معينة زي الجمعة البيضاء، عيد الأم، أو موسم العودة للمدارس. سواء كنت بتشتري حاجات أساسية للبيت، أو حتى بتفكر تجدد احتياجاتك الشخصية، التخفيضات بتكون فرصة حلوة لتوفير فلوسك. لكن عشان تحقق أقصى استفادة من الخصومات دي، لازم تعرف ازاي تخطط وتتعامل مع الفرص دي بشكل صحيح وتعرف ايه منها بيكون فرص حقيقية.
في المقال ده، هنعرفك على حيل ونصائح عملية عشان تستغل أوقات التخفيضات والعروض بأفضل طريقة ممكنة وتعرف ازاي تقدر تخطط لشراء ذكي.
8 نصائح لشراء ذكي وموفر
1- خطط قبل ما تشتري
العروض في حد ذاتها مغرية جدًا، لكن قبل ما تبدأ تشتري، لازم تخطط صح. أول حاجة اعمل قائمة بالحاجات اللي انت محتاجها فعلاً؛ عشان ماتنجرفش وراء العروض اللي مش ليك. ممكن تكتب الحاجات الأساسية اللي بتستخدمها في البيت، أو حتى الحاجات الشخصية اللي بتحلم بيها من زمان. كمان لازم تحدد ميزانية عشان ماتتفاجئش في الآخر بأنك صرفت أكتر من اللي كنت ناوي عليه.
نصيحة مهمة: قبل ما تبدأ رحلة التسوق بتاعتك، حاول تدوّر على العروض والتخفيضات على الإنترنت الأول. ده هيساعدك في المقارنة بين الأسعار وتجنب العروض الوهمية.
2- قارن بين أسعار المحلات والمواقع الأونلاين
من أكبر الأخطاء اللي بيعملها الناس وقت التخفيضات هي إنهم يشتروا الحاجة من أول محل يشوفوها فيه. وده غلط! لأن في بعض الأحيان بتكون نفس السلعة معروضة في محلات تانية بخصم أكبر أو إن التخفيضات مش حقيقية من الأساس! في أوقات كتير، المحلات بتضيف أسعار عالية قبل العروض عشان تحسسك إنك وفرت كتير. عشان كده، لازم تقارن الأسعار بين أكثر من محل أو موقع قبل ما تشتري.
نصيحة: قارن الأسعار المختلفة على الإنترنت باستخدام المواقع أو التطبيقات المتخصصة والمعروفة في ده.
3- تابع العلامات التجارية Brands المفضلة ليك
أوقات العروض والخصومات بتكون فرصة لشراء منتجات من العلامة التجارية المفضلة بأسعار أقل. لو عندك Brand معينة بتحبها، تابعها بشكل مستمر سواء على السوشيال ميديا، أو المواقع الخاصة بيها عشان تكون أول حد يعرف عن أي خصومات أو عروض جديدة.
نصيحة: لو في براند معينة بتحبها ومش بتعمل عروض كتير، جرب تدور على الكوبونات أو أكواد التخفيض على الإنترنت أو السوشيال ميديا. في كتير من المواقع بتقدم أكواد خصم عامة، حتى لو المنتج نفسه مش عليه خصم.
4- استغل العروض الموسمية
في أوقات أو مواسم معينة من كل سنة بيكون فيها تخفيضات كبيرة، زي الجمعة البيضاء، عيد الأم، أو الكريسماس. الفترات دي مشهورة بالعروض الضخمة وفي محلات بتقدم تخفيضات بتوصل لـ 70% وأكتر. عشان كده حاول دايماً تتابع صفحات المحلات دي على السوشيال ميديا عشان تعرف العروض وتجهز نفسك ليها.
نصيحة: لو عندك احتياجات موسمية زي لبس الشتاء أو الصيف، أو أجهزة إلكترونية جديدة، حاول تستغل الفترات دي عشان تقدر توفر وتشتري بأفضل الأسعار.
