التخطيط للمعاش واحد من أهم القرارات المالية اللي لازم أي شخص ياخدها في حياته. طول ما انت شغال، لازم توفّر شوية بشوية عشان سن التقاعد، وعشان تقدر توصل لأهداف معينة في مراحل عمرية معينة. على حسب المعهد القومي للتأمينات على المعاش، أكتر من 60% من البيوت اللي أصحابها بين 55 و64 سنة معاهم أقل من قيمة دخلهم السنوي في مدخرات المعاش.
ومع التغيرات الاقتصادية وارتفاع تكاليف المعيشة، أًصبح من الضروري نفكر ازاي نأمن مصدر دخل ثابت يساعدنا نعيش حياة كريمة بعد ما نبطل شغل. في المقال ده، هنشرح كل حاجة محتاج تعرفها عن المعاش والتخطيط ليه بطريقة سهلة وبسيطة.
ايه هو تعريف المعاش؟
المعاش هو دخل شهري ثابت بتاخده بعد ما توصل لسن التقاعد، واللي بيختلف حسب كل بلد ونظامها، فمثلاً في مصر سن التقاعد بيكون عند سن الستين. الفكرة في المعاش، إنه بيكون مصدر أمان مالي ليك بعد ما تبطل شغل، سواء من وظيفة حكومية أو قطاع خاص.
ليه مهم تخطط للتقاعد بدري؟
عشان زي ما قولنا مهم إنك تبدأ تخطط لسن التقاعد وتبني مدخرات للمعاش، دي شوية نصائح هتشرحلك أكتر ليه مهم تبدأ في الخطة دي بدري قد الإمكان:
1- الاستفادة من أرباح الفائدة المركبة
فكرة الفائدة المركبة بتعتمد بشكل كامل على الوقت. كل ما بدأت توفّر بدري، كل ما كان عندك وقت أطول عشان الفائدة المركبة تزوّد مدخراتك. الفائدة المركبة بتخلّي الفلوس تزيد بشكل كبير؛ لأنها بتتراكم على بعضها. يعني اللي يبدأ خطة توفير للمعاش في العشرينات، عنده وقت أكتر عشان فلوسه تكبر مقارنة بحد يبدأ في التلاتينات أو الأربعينات.
2- تحسين المرونة المالية
لو أجّلت التخطيط للمعاش لوقت متأخر، هتضطر توفر جزء أكبر من مرتبك عشان تحقق نفس الهدف، وده ممكن يقلل من مرونتك المالية في الوقت الحالي. وبالتالي السيناريو المثالي إنك تقدر توفّر للمعاش وفي نفس الوقت تستمتع بفلوسك دلوقتي. كل ما بدأت توفير للمعاش بدري، كل ما كان عندك حرية ومرونة أكتر في المبالغ اللي بتخصصها.
3- تقليل الاعتماد على النظام الاجتماعي
التخطيط للمعاش بدري يعني اعتماد أقل على دخل الضمان الاجتماعي فيما بعد. دخل الضمان الاجتماعي ممكن يكون غير مضمون في أوقات كتيرة، خصوصًا مع زيادة عدد الناس اللي بيحتاجوا للاستفادة منه. الأفضل إنك تخطط للمعاش بطريقة ما تخليكش معتمد اعتماد كُلي على الضمان الاجتماعي، وهو بيضمن حصول المستفيدين منه، زي الأسر الفقيرة على الدعم من الدولة عن طريق صندوق تكافل وكرامة. لما تبدأ التخطيط والتوفير من بدري، تقدر تموّل خطة التقاعد بشكل مستقل. مهم كمان إنك تضمن ترتيب أمورك المالية بشكل يسمح لك بالاعتماد على نفسك بدل الاعتماد الكامل على المساعدات الحكومية.
تبدأ خطتك منين؟
لو موضوع التوفير للمعاش مش من أولوياتك، متقلقش، أنت مش لوحدك. حوالي 45% من الناس اللي أعمارهم بين 25-34 سنة ما بدأوش يوفّروا للمعاش لسه. وعشان تبدأ، شوف ايه الخيارات المتاحة ليك للتوفير لوقت التقاعد. واللي منها إنك ممكن تبدأ تفكر في فتح حساب تقاعد في البنك، الحساب ده ممكن يكون حساب توفير تستخدمه لمدخرات المعاش وتسيب الفوائد تزوّد أرباحه مع الوقت.
