نجحنا في ماني فيللوز Money Fellows إننا نحقق إنجاز جديد في عالم التكنولوجيا المالية Fintech في إفريقيا، ونجحنا في الحصول على 13 مليون دولار في جولة تمويلية جديدة. وبكده بيوصل إجمالي استثمارات الشركة من وقت تأسيسها في 2017، لـ 60 مليون دولار.

شارك في قيادة جولة التمويل دي، Al Mada Ventures و DPI Venture Capital، وكمان ساهم فيها مستثمرين كبار زي Partech و CommerzVentures، وكلهم بيشتغلوا على دعم الابتكار في الأسواق الناشئة.

الهدف من التمويل الجديد

التمويل الجديد لماني فيللوز بيركز على أكتر من هدف، زي:

- تطوير وتحديث تطبيق ماني فيللوز، خصوصًا مع توسّع قاعدة المستخدمين اللي وصلت لـ أكتر من 8.5 مليون مستخدم.

- التوسّع في أسواق جديدة، خصوصاً في شمال إفريقيا، مع تركيز كبير على المغرب.

- تعيين فريق عمل أكبر لمواكبة نمو الشركة والعمل على تلبية احتياجات عملائنا.

كمان التمويل ده هيكون خطوة مهمة في توسعنا لأسواق جديدة، وتغيير شكل الطرق التقليدية في الادخار، والاقتراض، والاستثمار، من خلال تقديم خدمات مالية رقمية، آمنة، وسهلة الاستخدام؛ لتعزيز الشمول المالي، وتوفير خدمات مالية حديثة ومؤثرة للملايين في مصر وأفريقيا.

وقال "أحمد وادي" المؤسس والرئيس التنفيذي لماني فيللوز:

"ماني فيللوز أصبحت عنصر أساسي في منظومة التكنولوجيا المالية في أفريقيا، لأنها بتجمع بين قوة الجمعيات التقليدية والتكنولوجيا الحديثة. الاستثمار ده دليل على الإمكانيات الكبيرة اللي عندنا عشان نكمّل مشوارنا في تمكين الناس، خاصةً في المناطق اللي ما عندهاش خدمات مالية كافية، إنهم يدخروا، ويستثمروا، وياخدوا قروض بطريقة فعّالة وتكلفة أقل"