في وقت بقى فيه كل جنيه ليه تمن، وسعره بيتأثر بالتضخم وتغيّر السوق، الاستثمار في مصر بقى مش رفاهية، ده بقى ضرورة. ناس كتير بتدور على طريقة تحافظ بيها على فلوسها، أو تزودها حتى لو بنسبة بسيطة، ومن هنا دايماً بيظهر اسم شهادات الاستثمار كحل آمن ومضمون.
بس هل شهادات الاستثمار فعلاً أنسب اختيار لكل الناس؟ وهل العائد اللي بتقدمه يستاهل إنك تربط فلوسك سنة أو 3 أو 5؟ ولا فيه بدائل أذكى تديك مرونة أكتر وتحكم أفضل في فلوسك؟
الحقيقة إن شهادة الاستثمار مش قرار نقول عليه أبيض أو أسود. هي أداة من أدوات الاستثمار، مناسبة لناس، وممكن تكون مش مناسبة لناس تانية خالص. عشان كده، قبل ما تاخد قرار وتربط فلوسك فيها، لازم تكون فاهم:
- يعني ايه شهادة استثمار؟
- أنواعها ايه في مصر؟
- العائد بيتحسب إزاي؟
- امتى تكون استثمار ذكي… وامتى تبقى فلوس مركونة بدون فوائد.
خلينا في المقال ده نفهم الموضوع خطوة خطوة، وبأسلوب بسيط ومن غير تعقيد.
يعني ايه شهادة الاستثمار؟
شهادة الاستثمار هي وسيلة استثمار بتقدمها البنوك، بتقوم على إنك تحط مبلغ معين ولمدة محددة، والبنك يديك في المقابل عائد ثابت أو متغير. بمعنى أبسط:
- انت بتحط فلوسك في البنك
- البنك بيستخدمها في استثماراته
- وانت بتاخد عائد متفق عليه
عشان كده، ناس كتير بتعتبرها من أكتر طرق الاستثمار الآمن في مصر.
أنواع شهادات الاستثمار في مصر
السوق المصري في أكتر من نوع من شهادة الاستثمار، وأشهرهم:
1. شهادات بعائد ثابت
شهادة الاستثمار دي مناسبة للي بيحبوا الدخل الثابت وفيها العائد بيكون معروف من الأول، وبيتحسب بالشكل من الأشكال دي:
- شهري
- ربع سنوي
- سنوي
2. شهادات بعائد متغير
وفيها العائد بيتغير حسب سعر الفائدة اللي بيحدده البنك المركزي المصري. يعني ممكن يزيد أو يقل.
3. شهادات بعائد مقدم
وهنا بتاخد العائد في أول سنة، لكن فلوسك بتفضل مربوطة لحد نهاية مدة الشهادة.
العائد على شهادة الاستثمار بيتحسب ازاي؟
العائد بيكون نسبة مئوية من المبلغ اللي حطيته، لكن المهم هنا مش الرقم بس. لازم كمان تبص على:
- نسبة التضحم
- قيمة الفلوس بعد فترة
- هل العائد فعلاً هيزوّد قوتك الشرائية ولا لأ.
محتاج تكون عارف إن في حالات كتيرالعائد بيغطي الفائدة، بس مش بيكسبك كتير.
