ناس كتير بتفتكر إن الحياة من غير ديون هي المثالية، وده مش غلط، لكن مش كل الديون سيئة. في ديون ممكن تساعدك تحسّن وضعك المالي، زي القرض العقاري اللي بيساعدك تشتري بيت بدل ما تدفع إيجار طول عمرك. في المقابل، في ديون زي بطاقات الائتمان بفوائدها العالية، بتستنزف فلوسك وبتعتبر ديون سيئة.
لو حاسس إنك غرقان في ديون مش عارف تطلع منها، يبقى محتاج تبدأ تدوّر على طرق للتخلص من الديون أو حلول لإدارتها. وأول خطوة، هي إنك تفهم نوع الديون اللي عندك وتبدأ ترتبها عشان تقدر تسيطر عليها وتعيش براحة بال، وده اللي هنشرحه في مقال النهارده.
معنى إدارة الديون
هي ببساطة إنك تعمل خطة لتسديد ديونك سواء بطاقات ائتمان، قروض شخصية، أو ديون من غير ضمان. خطة الإدارة بتكون جدول فيه:
- عليك كام؟
- لمين؟
- هتدفع امتى وازاي؟
عادةً بتكون للديون غير المضمونة فقط زي بطاقات الائتمان والقروض الشخصية، وبتساعدك تمشي خطوة بخطوة ناحية الاستقرار المالي.
أنواع الديون
1- الديون الجيدة
ودي ببساطة هي الديون اللي بتاخدها عشان تزود دخلك أو تبني ثروتك على المدى الطويل. يعني لو الدين اللي أخدته هيخليك تكسب أكتر أو تمتلك حاجة ليها قيمة، فده يعتبر دين ذكي.
أمثلة على الديون الجيدة:
- التعليم:
الاستثمار في التعليم غالبًا من أنجح أنواع الديون. لما تاخد قرض عشان تكمّل تعليمك أو تاخد شهادة جامعية بره مثلاً، ده بيفتح لك فرص شغل أحسن.
- المشاريع الخاصة:
لو نفسك تبدأ بيزنس خاص بيك، ممكن تاخد قرض تمويل للمشروع. صحيح فيه مخاطرة، لكنها مخاطرة محسوبة ممكن تغيرلك حياتك.
- العقارات:
قرض العقار من أشهر أمثلة الديون الجيدة. ليه؟ لإنك بتبني أصل وتزوّد قيمته مع الوقت.
