بطاقات الائتمان Credit Cards ممكن تكون حل ممتاز لبعض المشتريات لو عندك انضباط مالي وبتعرف تتحكم في مصاريفك. لكن لو عندك صعوبة في سداد ديون بطاقات الائتمان وبتتعامل مع فوائد عالية وغرامات تأخير، الأفضل تبطل تستخدمها لحد ما ترتب أمورك المالية.

وبما إن احنا عارفين قد إيه صعب تتجاهل سهولة استخدام بطاقات الإئتمان، عشان كده جمعنا لك قائمة بأسباب تخليك تتجنب الاعتماد علىيها وكمان فوائد الدفع النقدي والادخار الذكي.

الوعي المالي قبل الاعتماد على بطاقات الإئتمان

قبل ما نتكلم عن أسباب تخليك تبعد عن بطاقات الإئتمان، مهم نفهم إن استخدامها مش دايمًا بيكون سلبي، لكنه محتاج وعي مالي وانضباط في السداد. كتير من الناس بيستخدموا بطاقات الائتمان عشان الراحة والقدرة على الشراء دلوقتي والدفع بعدين، لكن لو مفيش خطة واضحة، ده ممكن يدخلك في دوامة ديون متراكمة وفوائد عالية تأثر على ميزانيتك.

عشان كده، معرفة أسباب تجنب بطاقات الائتمان وفوائد الدفع النقدي أو التخطيط المالي الذكي قبل ما تستخدم البطاقة هتخليك تتحكم في مصاريفك أكتر وتفكر صح قبل أي شراء.

7 أسباب تخليك تقول لأ لبطاقات الإئتمان

1. تراكم الديون

مفيش طريقة تصرف أكتر من فلوسك لو كنت بتدفع كاش أو ببطاقة خصم مباشر Debit Card. لكن بعض شركات بطاقات الائتمان بتسمحلك تصرف أكتر من الحد الائتماني بتاعك.

المشكلة؟ هيتحسب عليك فوائد عالية، وده هيصعّب عليك تسدد ديون بطاقات الإئتمان. وكمان لو اتأخرت في دفع أقساطك سواء كنت خرجت عن الحد أو لأ، الديون ممكن تتراكم بسرعة ويكبر.

كمان، استخدام بطاقات الائتمان من غير ميزانية واضحة طريقة أكيدة إنك تدخل في ديون. الميزانية الصح لازم تعكس دخلك ومصاريفك بشكل واضح عشان تعرف تتحكم في مصاريفك. وده بيكون أسهل لو بتدفع كاش أو بـ Debit Card.

2. فوائد عالية

لو مش بتسد الرصيد اللي عليك بالكامل كل شهر، هتتحاسب على فوائد عالية على المبلغ المتبقي. المتوسط الحالي للفوائد على بطاقات الائتمان حوالي من 3% لـ 4% في الشهر وده رقم مهم تاخده في اعتبارك قبل ما تستخدم بطاقة الإئتمان في أي شراء.

3. تأثير سلبي على السجل الإئتماني I-Score

استخدام بطاقات الائتمان بحكمة ممكن يساعدك تبني سجل ائتماني قوي، لكن العكس صحيح برضه. لو فضلت محتفظ بمبالغ كبيرة على البطاقة من شهر للتاني، أو اتأخرت في الدفع، أو استعملت الحد الأقصى الكامل لكذا بطاقة، سجلّك الائتماني هيقل.

السجل الإائتماني I-score مهم جدًا، وبيستخدم في حاجات كتير:

• شركات تأمين العربيات ممكن تحسبلك أسعار أعلى لو سجلّك الإئتماني ضعيف.
• البنوك اللي هتديك قرض عقاري أو أي تمويل أكيد هتبص على سجلّك الائتماني قبل ما توافق أو ترفض طلبك.

اعرف كل حاجة عن السجل الإئتماني I-Score وازاي تحسّنه من المقال ده

4. التكلفة طويلة المدى عالية

على عكس أدوات مالية تانية ممكن تساعدك تزوّد فلوسك مع الوقت، زي حسابات التوفير عالية العائد أو شهادات الادخار، بطاقات الإئتمان ممكن تكلفك كتير على المدى الطويل. فمثلاً، في أوقات كتير الحد الأدنى للدفع ممكن بالكاد يغطي فوائد الشهر اللي اتحسبت عليك.

5. تشجيع الشراء العشوائي

الناس عادةً بتكون أقل استعداد لإنها تصرف فلوسها اللي اتحوشت بصعوبة كبيرة مقارنة باستخدام بطاقات الائتمان. وده لأن بطاقة الإئتمان سهلة الاستخدام جداً، يعني ممكن تشتري بيها من غير ما تفكر مرتين.

كل اللي عليك إنك تعمل أوردر أونلاين أو تدفع في المحل، والمنتج بقي ملكك. وده بيخليك تصرف أكتر من اللي خططت له. وكمان، ممكن تشتري حاجات أصلاً ماكنتش ناوي تشتريها من البداية لمجرد سهولة الدفع وتوفر الفلوس معاك.

6. احتمالية الوصول للإفلاس

ممكن تكون نيتك في البداية إنك تستخدم بطاقة الإئتمان وتسددها بالكامل كل شهر، لكن سهل جداً النية دي تتغير والديون تكبر وتخرج عن السيطرة، لدرجة ممكن تتعدى قدرتك على السداد. وهنا بيكون الوصول للإفلاس حتمي ويادوب بتقدر تعيش بالمرتب أو المصروف الشهري، وكل ده بدوره هيأثر على تاريخك الإئتماني I‑Score لمدة توصل لعشر سنين. عشان كده مهم جداً تفكر في الخطة دي قبل ما تاخدها وتكون صريح قدام نفسك في مدى التزامك بالسداد.

7. التوتر والضغط

وجود ديون بتجري وراك ممكن يضغط على عقلك جداً، خصوصاً لو مش قادر تسددها بسهولة. ممكن تلاقي نفسك بتحاول قدر الإمكان توفق بين المصاريف والديون، وده ممكن يأثر على صحتك النفسية على المدى الطويل.

لكن لو بتدفع كاش أو ببطاقة الخصم المباشر Debit Card، هتتعود بسرعة على فكرة إن المنتج ملكك أول ما تدفع وإن ده بياخد من فلوسك الكاش، ومش هتعيش ضغط الديون.

البديل الذكي لبطاقات الإئتمان: كارت ماني فيللوز

كارت ماني فيللوز هو كارت مسبق الدفع وبيخليك تشتري اللي محتاجه كاش وبطريقة منظمة، بدون فوائد عالية أو ديون متراكمة.

ازاي كارت ماني فيللوز بيساعدك:

• تقدر تقبض قبض الجمعيات عليه بدون أي رسوم أو فوائد، وتدفع بيه كل مشترياتك من غير ضغط مالي سواء أونلاين أو أوفلاين.
• الكارت بيخليك تتعلم تخطط لكل عملية شراء لإنك بتدفع من فلوسك مباشرةً مش فلوس البنك زي بطاقات الإئتمان.
• بيوفر لك عروض مستمرة سواء بكاش باك مع مشترياتك، عروض مع أكبر العلامات التجارية، أو خصومات على الجمعيات لما تدفع القسط بالكارت.

وفي ديسمبر تقدر تشترك في جمعية وتدفع أول قسط في يناير بالكارت وهيرجعلك على الكارت كاش باك 2000 جنيه تصرفهم براحتك من هنا.

ولو لسه مانزلتش أبلكيشن ماني فيللوز، نزله من هنا.

الأسئلة الشائعة عن بطاقات الإئتمان

1- هل استخدام بطاقات الإئتمان دايماً خطر؟

لأ، استخدام بطاقة الإئتمان Credit Card ممكن يكون آمن لو عندك ميزانية واضحة وبتسدد اللي عليك كامل كل شهر. لكن لو مش منضبط، الفوائد والديون ممكن تتراكم بسرعة انت مش متخيلها.

2- استخدام بطاقة الإئتمان ممكن يأثر على السجل الإئتماني I-Score؟

أيوه، لو اتأخرت في الدفع أو استخدمت كذا بطاقة للحد الأقصى، ممكن الـ I-Score أو تقييمك الائتماني يقل، وده هيأثر على فرص الحصول على قروض أو تمويلات مستقبلية.

3- هل في طريقة استخدم بيها بطاقة الإئتمان من غير ما أقع في الديون؟

أه، نظم مصاريفك، حدد حد أقصى للشراء الشهري، ودايماً حاول تدفع الفلوس اللي عليك بالكامل كل شهر.

بطاقات الإئتمان Credit Cards ممكن تكون أداة ممتازة عشان تشتري حاجات كبيرة أو تكسب عروض من البنوك. لكن المشكلة إن من السهل جدًا إنك تصرف أكتر من اللازم وتفضل مديون. ومن غير ما تحس، هتلاقي نفسك بتدفع فوائد ورسوم أكتر من المكافآت اللي كسبتها.

بالتالي لو هتستخدمها، انت محتاج تستخدم بس المبلغ اللي أنت متأكد إنك تقدر تسدده في ميعاده. ده هيساعدك تتحكم في مصاريفك وتستفيد بالكارت من غير ما تقع في الديون.

وممكن توفر على نفسك وتشتري احتياجاتك بفلوسك لما تنزل أبلكيشن ماني فيللوز وتدخل جمعية بالمبلغ والمدة المناسبين ليك بدون ما تدخل في دائرة ديون وأقساط مابتنتهيش.