التضخم من المصطلحات اللي بنسمعها كتير الكام السنة اللي فاتوا، ومعظمنا محتاج يفهمه ويعرف تأثيراته على حياته الشخصية. التضخم هو اتجاه عام في الاقتصاد لزيادة الأسعار بشكل مستمر من سنة للتانية. معدل التضخم بيحدد قد ايه الاستثمارات بتفقد قيمتها الفعلية، وقد ايه الأسعار بتزيد مع الوقت. كمان التضخم بيوضح للمستثمرين النسبة المئوية اللي استثماراتهم محتاجة تحققها عشان يحافظوا على مستوى معيشتهم.
ومن الأخبار اللي أعلن عنها البنك المركز في نوفمبر اللي فات، إن نسبة التضخم في مصر 2024 انخفضت في أكتوبر وأصبحت 24.4% بدل 25% في سبتمبر. التضخم مش بس بيأثر على الاقتصاد والبلد اللي انت فيها، هو بيأثر بشكل كبير على فلوسك ومدخراتك.
وبالتالي، في المقال ده هنناقش معنى التضخم، أسبابه، ازاي بيتقاس، وكمان ازاي تحمي نفسك وأموالك منه.
ما هو التضخم؟
بشكل بسيط جدأ، معنى التضخم هو لما الأسعار تزيد وبالتالي قيمة الفلوس تقل. يعني الجنيه اللي في إيدك بتبقى قيمته أقل لما أسعار السلع والخدمات عموماً تزيد. أكيد فاكر لما كنت صغير وكنت بتقدر تشتري حاجات أكتر بنفس المبلغ مقارنة باللي تقدر تشتريه النهارده، وده بسبب التضخم.
رغم إن التضخم ليه بعض المزايا، إلا إنه كمان ليه عواقب على الاقتصاد وعلى الأفراد لما الأسعار ترتفع بشكل كبير وقيمة الفلوس تقل. ولو معدلات التضخم زادت جدًا، ممكن تساهم في دخول الاقتصاد في حالة ركود اقتصادي (وده هنشرحه أكتر لما تكمل المقال).
مهم تعرف أن لو حصل زيادة مفاجئة في الأسعار بسبب زيادة في سعر البترول أو فرض ضريبة جديدة، ده مش بيعتبر تضخم حقيقي، إلا لو السبب كان إن الزيادة دي أدت لارتفاع الأجور والتكاليف بشكل مستمر وبقى في حلقة مفرغة بين الأجور والأسعار.
كمان لو ارتفع سعر منتج واحد فقط، ده مش بالضرورة يكون تضخم، لكن ممكن يكون تغير نسبي في السعر. التضخم في النهاية مرتبط بنمو المعروض النقدي، وده بيحصل لما يكون في فلوس أكتر في السوق مقارنة بالمنتجات المتاحة. الأسعار بترتفع لأن فيه فلوس أكتر بتنافس على منتجات أقل.
أسباب التضخم
زيادة المعروض النقدي هي السبب الأساسي للتضخم، وده ممكن يحصل بطرق مختلفة في الاقتصاد. السلطات المسؤولة عن الكاش أو النقد في أي بلد ممكن تزود المعروض النقدي عن طريق:
- طباعة فلوس أكتر وتوزيعها على الناس.
- تخفيض القيمة الرسمية للعملة المحلية بشكل قانوني.
- خلق فلوس جديدة من خلال القروض كبطاقات ائتمانية في حسابات الاحتياطي عن طريق شراء السندات الحكومية من البنوك في السوق الثانوي.
هل التضخم هو نفسه الركود؟
التعريف:
التضخم: هو الزيادة في مستويات أسعار السلع والخدمات في الاقتصاد.
الركود: هو فترة تباطؤ في الاقتصاد وبيتميز بالنمو السلبي.
ازاي بيتم قياسه؟
التضخم: بيتقاس عن طريق مؤشرين، مؤشر أسعار المستهلك (CPI) ومؤشر أسعار الجملة (WPI).
الركود: بيتقاس من خلال انخفاض الناتج المحلي الإجمالي للدولة (GDP).
كيفية الحدوث:
التضخم: بيحصل بشكل مستمر في الاقتصاد.
الركود: بيحصل نتيجة وجود ظروف اقتصادية معينة.
كيف يؤثر التضخم على مدخراتك؟
تخيل معانا إنك حوّشت 100 جنيه وحطيتهم في حصالة مثلاً كام سنة. لما تيجي تبص عليهم بعد شوية، هتلاقيهم لسه 100 جنيه زي ما هما. بس المشكلة إنك لما تيجي تصرفهم، مش هيشتروا نفس الحاجة اللي كانوا بيشتروها قبل كده. بسبب التضخم، الأسعار بتعلى وقيمة الفلوس أو قوتها الشرائية بتقل.
ولو تخيلنا الموضوع بطريقة تانية، كأنك فتحت الحصالة ولقيت 50 جنيه بدل الـ 100 اللي كنت محوّشهم! هتحس إنك خسرت 50 جنيه، وده بالظبط اللي بيعمله التضخم في فلوسك. نفس الحاجة بتحصل لو حوّشت فلوسك في حساب بفوائد أقل من نسبة التضخم. الفلوس بتفقد قيمتها مع الوقت والخسارة بتكون واضحة، فمثلاً:
- لو التضخم استقر على 6% لمدة 5 سنين، كل 1000 جنيه متحوّشه ممكن تخسر حوالي 243 جنيه من قيمتها.
- ولو التضخم استقر على 8% لمدة 5 سنين، الخسارة هتزيد لـ 311 جنيه.
عشان كده مهم جداً تعرف ازاي تحمي مدخراتك من التضخم. المشكلة كمان إن كتير من الناس مش واخدين بالهم من تأثير التضخم، خاصةً إن نسبته كانت منخفضة جدًا على مدار الـ 30 سنة اللي فاتت، والأغرب إن في نسبة كبيرة من المدخرين مايعرفوش إن التضخم أصلاً مشكلة!
