المرتب بيطير قبل نص الشهر؟ بتصرف كتير ومش عارف الفلوس بتروح فين؟ أو نفسك تبدأ توفّر بس مش عارف تبدأ منين؟ عايزين نطمنك، أنت مش لوحدك! إدارة الفلوس بقت تحدي كبير في الزمن ده، خصوصاً مع الأسعار اللي بتزيد كل يوم.
بس في طريقة بسيطة وفعّالة ممكن تغيّر كل ده، اسمها قاعدة 50/30/20. القاعدة دي مش محتاجة حسابات معقدة ولا تخطيط كبير، وكل اللي محتاجه إنك تقسّم دخلك لثلاث أجزاء، وكل جزء ليه دور في تنظيم حياتك المالية.
تعالى نعرف سوا ازاي القاعدة دي ممكن تساعدك تعيش مرتاح، تظبط ميزانية الشهر، وتحقق أهدافك من غير ما تحس إنك مضغوط!
ما هي قاعدة 50/30/20؟
قاعدة 50/30/20 بتقوم على تقسيم الدخل الشهري لـ 3 فئات واضحة:
- 50% للاحتياجات: زي الإيجار، فواتير البيت، الأكل، والمصاريف الأساسية اللي مينفعش تستغنى عنها.
- 30% للرغبات: خروجات، ترفيه، أكل بره، أو أي حاجة بتحب تعملها عشان تبسط نفسك.
- 20% للتوفير: سواء بتحوّش لطوارئ، استثمار، أو حتى أهداف مالية طويلة المدى.
القاعدة دي انتشرت بفضل السيناتورة الأمريكية "إليزابيث وارن" واللي ساعدت ناس كتير على تنظيم دخلهم وتحقيق أهدافهم المالية. الجميل في القاعدة دي إنها سهلة، منطقية، وقابلة للتطبيق على المدى الطويل.
لو بتدور على طريقة تخلّي الميزانية الشهرية ماشية معاك من غير تعقيد، يبقى قاعدة 50/30/20 هي البداية الصح!
