الدرس الأول: الفقراء والطبقة المتوسطة بيشتغلوا عشان الفلوس. لكن الأغنياء بيخلّوا الفلوس هي اللي تشتغل ليهم

الأب الغني للكاتب "كيوساكي" علمه من زمان إن الناس العادية بتقضي حياتها تشتغل عشان تجيب فلوس، سواء من شغل ثابت، أو مشروع خاص بيهم، أو حتى شغل جانبي. لكن الأغنياء فعلاً فاهمين إن الفلوس المفروض هي اللي تشتغل ليهم. بدل ما يعتمدوا بس على مرتب كل شهر، هما بيستثمروا في حاجات بتجيب دخل زي الأسهم، والسندات، أو العقارات.

نصيحة: فكر كده، هل انت شغال عشان الفلوس، ولا الفلوس هي اللي شغالة ليك؟

الدرس الثاني: الفكرة مش في كم الفلوس اللي انت بتكسبه، الفكرة في الفلوس اللي انت بتحوّشها

ناس كتير فاكرة إن الدخل الكبير هو السر عشان تبقى غني. لكن "كيوساكي" بيقول إن الموضوع مش في قد ايه بتكسب، لكن في قد ايه بتحتفظ بالفلوس. الناس اللي بتاخد دخل عالي ممكن يبقوا في مشاكل مالية لو مش قادرين يديروا فلوسهم صح. السر في بناء الثروة هو إنك تدخر وتستثمر بحكمة.

نصيحة: تابع مصاريفك ودوّر على الحاجات اللي تقدر توفر فيها أكتر.

الدرس الثالث: الثقافة المالية مهمة وبتفرق في حياتك

"كيوساكي" بيقول إن الواحد ممكن يكون متعلم تعليم عالي، ناجح في شغله، لكنه مش فاهم في الفلوس! وبيأكد على وجود فجوة كبيرة في التعليم؛ لإن في ناس كتير بيتخرجوا من الجامعات من غير ما يكون عندهم المهارات المالية الأساسية. ونتيجة لكده، الناس المتعلمة أحياناً بيواجهوا صعوبات مالية، حتى لو ناجحين في شغلهم.

نقص الفهم المالي، يعني إنهم مش عارفين يديروا الفلوس صح أو يحافظوا عليها أو يخلوها تشتغل ليهم. وده بيخليهم يتعرضوا لمشاكل في تدفق الفلوس. هما ببساطة اتعلموا ازاي يشتغلوا عشان يجيبوا فلوس، لكن مش ماتعلموش ازاي يخلوها تشتغل ليهم.

نصيحة: فكر ايه المفاهيم المالية اللي حاسس إنك مش فاهمها كويس وعايز تتعلم عنها أكتر؟

الدرس الخامس: اشتغل عشان تتعلم، مش بس عشان الفلوس

"كيوساكي" بيقول إن: "أمان الوظيفة كان كل حاجة لوالدي الفقير، في الوقت اللي التعليم كان كل حاجة لوالدي الغني."

كمان بيشجع الناس إنهم يختاروا شغل وفرص مهنية فيها فرص تعليم مش بس يركزوا على المرتب اللي هياخدوه. لما تكسب مهارات ومعرفة جديدة، ده هيزوّد فرصك في كسب فلوس أكتر ويوفر لك فرص جديدة للنمو المالي.

نصيحة: قيّم شغلك الحالي وفكر، هل بتتعلم مهارات جديدة ممكن تحسّن دخلك في المستقبل؟

الدرس السادس: ادفع لنفسك أولاً

من المبادئ الأساسية اللي الكاتب بيعلّمها لينا، هي أهمية إنك تدفع لنفسك أولاً. وده مصطلح مالي معناه إنك تشيل على جنب مبلغ للادخار في الأول قبل ما تصرف على الفواتير والاحتياجات المعتادة للشهر. لما تخصص جزء من دخلك للادخار أو للاستثمار بانتظام، ده هيساعدك تمشي في خطوات بناء ثروة بشكل ثابت.

"كيوساكي" بيقول: "لو مش قادر تتحكم في نفسك، متحاولش تبقى غني. مفيش معنى لفكرة إنك تستثمر، فتكسب فلوس، وبعدين تضيعها. قلة التحكم الذاتي هي السبب إن كتير من اللي بيستثمروا بيخسروا فلوسهم بسرعة بعد ما يكسبوا ملايين. وهي السبب إن الناس اللي بياخدوا زيادات في المرتبات، أول حاجة بيفكروا فيها، هي ازاي يصرفوها في كل حاجة بيحلموا بيها، وبالتالي ما بيحصلش فرق في حياتهم."

نصيحة: عوّد نفسك إن أول ما ينزل المُرتب، تحوّل مبلغ منه على حساب ادخار أو تستغله في الاستثمار.

الدرس السابع: اتغلب على خوفك من خسارة الفلوس

هنا الكاتب بيقول: "اللي بينجحوا مش خايفين من الخسارة. الخسارة أو الفشل جزء من عملية النجاح."

الخوف من خسارة الفلوس ممكن يوقفك عن اتخاذ المخاطر أو الخطوات اللي ممكن توصلك للنجاح المالي. وعشان كده "كيوساكي" بيشجع الناس إنهم ياخدوا مخاطر محسوبة، ويتعلموا من غلطاتهم، وما يخلّوش خوفهم من الفشل يمنعهم من السعي وراء فرص كويسة لبناء الحرية المالية.

نصيحة: فكر ايه المخاطر المالية اللي اتجنبتها بسبب خوفك؟ ابدأ بخطوات بسيطة ومحسوبة أكتر.

الدرس الثامن: الاستثمار مش حظ

في ناس كتير بتشبه الاستثمار بلعب القمار وده بسبب فهمهم لإنه بيعتمد بشكل أساسي على الحظ. لكن "كيوساكي" بيوضّح إن في فرق مهم بين الاستثمار المدروس والحظ. وبيأكد إن الاستثمار الناجح محتاج معرفة، بحث، واستراتيجية، مش مجرد حظ. لما تفهم السوق، تحلل المخاطر والمكاسب المحتملة، وتاخد قرارات مبنية على معلومات، ده بيبقى استثمار محسوب مش مجرد قمار معتمد على الحظ.

نصيحة: قبل ما تستثمر في أي حاجة، اعمل بحث كويس.