في الوقت ده، كلنا بقينا ندوّر على حلول دفع سهلة وسريعة، عشان كده الكروت مسبقة الدفع بقت اختيار مفضّل لناس كتير. يعني بدل ما تضطر تفتح حساب بنكي أو تستخدم بطاقة ائتمان Credit Card مع كل المشاكل اللي ممكن تحصل، الكروت مسبقة الدفع بتوفر لك طريقة آمنة ومرنة عشان تدير فلوسك براحتك. ازاي؟ أنت ببساطة بتشحن الكارت بالمبلغ اللي محتاجه، وتقدر تستخدمه سواء في المشتريات اليومية أو حتى على الإنترنت، كأنك معاك فلوس في جيبك بس بشكل إلكتروني.
ومن الكروت دي، كارت ماني فيللوز مسبق الدفع Prepaid Card، اللي بيعتبر واحد من أفضل الخيارات الموجودة حالياً في السوق. الكارت مش بس بيسهل عليك الدفع والشراء، لكن كمان بيحافظ على أمانك ويحميك من الاحتيال، لأنك مش مطالب تفتح حساب بنكي عشان تستخدمه. كل اللي عليك هو شحن الكارت بالطرق المختلفة بالمبلغ اللي يناسبك، وتبدأ في استخدامه على طول. الكارت ده مناسب لعملاء ماني فيللوز وللناس اللي مش عايزة تتعامل مع الإجراءات البنكية المعقدة، وعايزة طريقة دفع سريعة وسهلة.
وفي باقي المقال هتلاقي كل الأسئلة والإجابات لكل حاجة ممكن تكون عايز تعرفها عن كارت ماني فيللوز الجديد.
ايه مميزات كارت ماني فيللوز مسبق الدفع Prepaid Card؟
- الجمعية: ادفع قسط الجمعية واقبض بسهولة على الكارت بدون رسوم خدمة.
- عروض مختلفة: استمتع بعروض وخصومات حصرية من شركائنا.
- إيداع وسحب بسهولة: إيداع من خلال الجمعية، ATM، كروت البنوك، أو المحفظة الإلكترونية، وسحب من أي ماكينة صراف آلي أو فوري بلس.
- تحكم سهل: اتحكم في الكارت من خلال تطبيق ماني فيللوز.
- كاش باك: 5% كاش باك بحد أقصى 100 جنيه لكل عملية شراء (لفترة محدودة).
ازاي تطلب كارت ماني فيللوز؟
لطلب كارت ماني فيللوز، في طريقتين:
- لو كنت من عملاء ماني فيللوز وداخل في جمعية بالفعل، مصاريف إصدار الكارت 149 جنيه، وهتقوم بالخطوات دي:
- ادخل على تطبيق ماني فيللوز واطلب الكارت بالضغط على "كارتي".
وفي اللحظة اللي هيتقبل فيها طلبك، هتقدر تستلمه من الأماكن اللي هنقولك عليها في المقال ده.
- لو كنت من عملاء ماني فيللوز ومادخلتش جمعية قبل كده أو مش من عملاء ماني فيللوز وأول مرة هتستخدمه، مصاريف إصدار الكارت هي 149 جنيه. وهتقوم بالخطوات دي:
1. نزّل التطبيق ودخل بياناتك كاملة.
2. اطلب الكارت بالضغط على "كارتي".
3. ارفع البطاقة الشخصية واستنى لحد ما يتم قبول طلبك.
ودلوقتي خلينا نجاوب على أشهر الأسئلة الخاصة بـ كارت ماني فيللوز:
1- ايه هي فترة مراجعة الحساب لقبول طلب الحصول على الكارت؟
عادةً بيتم قبول طلبك في خلال دقائق وبتقدر بعدها تستلم الكارت بشكل طبيعي.
ملحوظة: أحياناً ممكن تاخد فترة مراجعة بياناتك والبطاقة الشخصية 3 أيام عمل لقبول طلبك لاستلام الكارت.
2- ازاي استلم كارت ماني فيللوز؟
زور أقرب نقطة استلام من المسجلين على تطبيق ماني فيللوز لفروع فوري بلس أو فرع من فروع ماني فيللوز في المنصورة والزقازيق عشان تستلمه. محتاج يكون معاك البطاقة الشخصية وهتحتاج تمضي على وثيقة "اعرف عميلك" عند مكان الاستلام.
3- ازاي أفعّل كارت ماني فيللوز؟
عشان تفعّل الكارت، محتاج تعمل الخطوات دي:
- اعمل سكان بكاميرا الموبايل للكود الموجود مع الكارت.
- اختار "تفعيل" من صفحة "الكارت" الموجودة على التطبيق.
- دخّل اخر 4 أرقام موجودين على الكارت
- دخّل كود التفعيل الموجود على ضهر الكارت.
