كتير بنلاقي نفسنا محتارين بين الرغبة بالاستمتاع الفوري بالفلوس اللي معانا في الوقت الحالي وبين الحاجة لتأمين مستقبلنا. تعالى نتخيل كده مع بعض، لو معاك دلوقتي فلوس كتير تعمل بيها ايه من الاختيارين دول: تصرفها على سفرية أوروبا اللي نفسك فيها بقالك كتير، ولا تستثمرها بحِكمة عشان تأمن مستقبلك؟ احنا عارفين ان الاختيارات هتختلف باختلاف الأشخاص ومفيش اختيار واحد منهم مُرضي للكل!

بس في حالة إنك فهمت الفروق والمميزات بين الأهداف طويلة الأجل والأهداف قصيرة الأجل، هتقدر تاخد قرارات مناسبة لطموحاتك أو أهدافك في مرحلة معينة. فجهز نفسك ويلا نكتشف سوا في المقال ده الفرق بين الاستثمار طويل الأجل وقصير الأجل وايه هو الطريق المثالي للنجاح المالي.

ما هي الاستثمارات قصيرة الأجل؟

الاستثمارات قصيرة الأجل هي أًصول أو أدوات مالية بيتم شرائها للاحتفاظ بيها لفترة قصيرة نسبياً، عادةً الفترة دي بتكون من 6 شهور لأقل من 5 سنين. النوع ده من الاستثمارات بيتميز بالسيولة وقلة المخاطرة مقارنة بالاستثمارات طويلة الأجل، واللي هنتكلم عنها. الاستثمار قصير الأجل ليه أهداف رئيسية، زي الحفاظ على رأس المال، تحقيق عائد بسيط، وسهولة الوصول للفلوس دي وقت ما تكون محتاجها.

أفضل أنواع الاستثمارات قصيرة الأجل

- الكاش وما يساويه: يشمل النوع ده حسابات التوفير، وشهادات البنوك (CDs) اللي مدتها بتكون سنة أو أقل. ورغم إن الأدوات دي بتوفر عائد منخفض، إلا إنها بتتميز بالسيولة العالية والأمان النسبي.

- أذون الخزانة: وهي عبارة عن أوراق مالية قصيرة الأجل بتقوم الحكومة بإصدارها وعادةً بتكون مدتها ما بين كام يوم وسنة. تعتبر أذون الخزانة استثمارات قليلة المخاطر جداً وغالباً ما بيتم استخدامها كمؤشر لأسعار الفائدة قصيرة الأجل.

- صناديق الاستثمار: ودي بتكون صناديق استثمار بتستثمر في أوراق مالية قصيرة الأجل ومنخفضة المخاطر، زي أذون الخزانة، وشهادات البنوك (CDs). الهدف من صناديق الاستثمار هو الحفاظ على قيمة ثابتة للأصول وفي نفس الوقت وتوفير السيولة للمستثمرين.

- السندات قصيرة الأجل: مستثمرين كتير بيختاروا الاستثمار في سندات تكون مدتها قصيرة، عادةً سنة أو أقل. رغم إن السندات دي بتوفر عائد أعلى من الكاش، إلا إنها بتعتبر منخفضة المخاطر مقارنة بالسندات طويلة الأجل.

ما هي الاستثمارات طويلة الأجل؟

الاستثمارات طويلة الأجل هي عبارة عن أصول أو أدوات مالية بيتم الاستثمار فيها بنية الاحتفاظ بيها لفترة طويلة، واللي عادةً بتكون أكتر من سنة. الهدف الرئيسي من النوع ده من الاستثمار هو زيادة رأس المال وتكوين ثروة على المدى الطويل. بشكل عام الاستثمارات طويلة الأجل مرتبطة باستراتيجية "الشراء والاحتفاظ" واللي فيها بيستفيد المستثمرين من النمو المحتمل والفوائد المتراكمة بمرور الوقت.

أفضل أنواع الاستثمارات طويلة الأجل

- الأسهم: النوع ده عبارة عن إنك بتستثمر في أسهم شركات معينة أو صناديق استثمارية على المدى الطويل. الأسهم دي بتوفرلك حصة ملكية في الشركات اللي بتتداول في البورصة المصرية، النوع ده بيكون عنده إمكانية زيادة رأس مالك على المدى الطويل.

- السندات: معناها استثمارك في سندات حكومية أو سندات شركات لمدة طويلة. السندات دي بتتميز انها بتوفرلك فوائد ثابتة على مدار الوقت وكمان بترجعلك المبلغ الأساسي عند ميعاد الاستحقاق.

- العقارات: عبارة عن شراء البيوت، أو المباني التجارية، أو الأراضي بنية الاحتفاظ بيها لفترة طويلة. الاستثمار في العقارات عنده القدرة على تحقيق دخل إيجار جيد وزيادة القيمة على المدى الطويل.

- شهادات البنوك طويلة الأجل: النوع ده من الاستثمار، بيتم فيه الاستثمار في شهادات البنوك (CDs) لفترات أطول، عادةً بتصل لعدة سنوات. توفر شهادات البنوك معدلات فائدة ثابتة وعائدا متوقع على المدى الطويل.

عوامل يجب مراعاتها عند الاختيار بين الاستثمارات طويلة الأجل وقصيرة الأجل

الاختيار بين الاستثمارات طويلة الأجل وقصيرة الأجل بيعتمد بشكل أساسي على الوقت اللي قدامك والأهداف المالية الخاصة بيك، ومدى قدرتك على تحمل المخاطر. ولكن الأكيد إن نوعين الاستثمارات ممكن يكون ليهم مكان في محفظتك الاستثمارية. ودي العوامل اللي محتاج تفكر فيها قبل الاختيار ما بينهم:

1- أهداف الاستثمار والفترة الزمنية

الأهداف الاستثمارية هي العامل الأول أو البوصلة اللي بتوجهك لاختيار الاستثمارات المناسبة ليك، أما العامل التاني فهو الفترة الزمنية، بمعنى (مش هتحتاج الفلوس اللي انت بتستثمرها لفترة مدتها قد ايه). وبالتالي انت محتاج تقسّم أهدافك المالية على حسب الوقت اللي قدامك، سواء كان قريب أو بعيد عشان تقدر تختار الاستثمارات اللي تناسبك أكتر.

المستثمرين اللي عندهم أهداف محتاجين يحققوها خلال فترة قريبة، بيختاروا استثمارات قصيرة الأجل. هتلاقي ناس بتختار استثمارات زي السندات اللي مدتها سنة أو شهادات البنوك قصيرة الأجل لو هدفهم هو تأمين وتنمية مدخراتهم لفترة معينة جاية، زي دفعة قسط بيت جديد أو سفرية قريبة.

أما بالنسبة للاستثمارات قصيرة الأجل التانية، زي حسابات التوفير بعائد، بتكون جذابة للمستثمرين اللي عايزين يوصلوا لفلوسهم بشكل أكتر مرونة؛ وده لأن الفلوس المستثمرة في السندات أو شهادات البنوك (CDs) مابتقدرش تسحب منها قبل ما توصل تاريخ الاستحقاق وإلا بيتم توقيع غرامة عليك.

من ناحية تانية، المستثمرين اللي بيخططوا يحققوا أهداف معينة على فترة زمنية بعيدة، بيختاروا استثمارات طويلة الأجل، وبيكونوا متأكدين إنهم مش هيسحبوا من الفلوس دي لفترة سنين طويلة؛ عشان يتجنبوا تقلبات أسعار السوق ويستفيدوا من نموه على المدى البعيد.

2- المخاطر والتقلبات

بعيداً عن تقييم العائد المحتمل من الاستثمار، فهم تقلبات السوق على مر السنين بيساعدك تختار الاستثمارات اللي بتتناسب مع درجة تحملك للمخاطر، فمثلاُ ممكن يكون فيه صندوقين بيحققوا نفس العائد على المدى الطويل لكن مستوى التقلبات اللي بتحصلهم مختلف تماماً. عشان تختار الاستثمار المناسب، سواء كان قصير أو طويل الأجل، لازم تكون واضح مع نفسك بخصوص كمية المخاطر والتقلبات اللي تقدر تتحملها.

المستثمرين اللي بيتجنبوا المخاطر في الاستثمارات قصيرة الأجل ممكن يختاروا إنهم ينمّوا فلوسهم بأمان من خلال حسابات فيها فوائد زي شهادات البنوك (CDs)، اللي بتعتبر استثمار منخفض المخاطر جداً. بشكل عام، المستثمرين اللي عندهم فترات زمنية أطول يقدروا يتحملوا مخاطر أكتر؛ لأنهم يقدروا يفضلوا يستثمروا لفترة كافية عشان يتغلبوا على أي تراجعات أو تقلبات في السوق. وده السبب اللي بيخلّي الاستثمارات طويلة الأجل زي الأسهم مثالية لو لسه قدامك سنين مثلاُ قبل ما تتقاعد، حتى لو هتعاني من تقلبات السوق، فهيكون عندك وقت تعوّض.

هل الاستثمار اختيار جيد لتحقيق الأهداف طويلة الأجل؟

نعم، الاستثمار طريقك للأمان المالي واختيار جيد للأهداف طويلة الأجل، زي التخطيط للتقاعد، أو شراء بيت جديد، أو حتى الادخار لتعليم أولادك. وجود خطة واستثمارات على مدى سنين طويلة ممكن يساعد فلوسك انها تزيد وتساعدك في إنك تكون مستعد للمصاريف الكبيرة في الحياة. الاستثمار طويل الأجل كمان بيساعدك تقلل من حدة التقلبات اليومية في السوق.

وفي الاخر، محتاج تعرف إن مهم تحدد الأهداف الاستثمارية قصيرة، ومتوسطة، وطويلة الأجل؛ وده لأن كل نوع من الاستثمارات دي بيحتاج استراتيجية مختلفة ونوع مختلف من الاستثمارات. وزي ما وضحنّا في المقال، في استثمارات مناسبة لهدفك قصير الأجل لكنها ممكن تكون غير مناسبة للمدى الطويل والعكس صحيح.