الاستثمار ممكن يكون من أكتر المفاهيم المالية المًعقدة، بس كمان هو من أهم أساسات الاستقلال المالي وبناء ثروة. فهم مصطلحات الاستثمار الكتيرة ممكن يكون مُرعب في البداية، بس مع فهم المصطلحات والأساسيات، هتبدأ تحس بالراحة والثقة خلال رحلة استثمارك.

ومن المعلومات المغلوطة إن الاستثمار للأغنياء فقط، الاستثمار هو طريق يقدر الكل يمشيه لبناء ثروته وزيادة فلوسه. فهم ازاي تبدأ في الاستثمار، خاصةً لما تكون دي أولى خطواتك في طريقه، هو أول خطوة للاستقلال المالي. ودلوقتي جهّز نفسك عشان في مقال النهارده، هناخدك في رحلة سريعة تتعرف فيها على كل حاجة ليها علاقة بالاستثمار، وأساسياته، وازاي تبني ثروتك من خلاله.

ما هو الاستثمار باختصار؟

الاستثمار باختصار هو عملية شراء أصول مالية، زي الأسهم بهدف تحقيق ربح، راتب منتظم، أو أي نوع من أنواع العائد المستقبلي. الاستثمار اختيار مالي كسبان لإنك ببساطة لو سبت فلوسك في الحساب الجاري أو حساب التوفير، مش هتقدر تواكب الزيادة اللي بتحصل في تكلفة المعيشة بشكل عام وتبني ثروة لمستقبلك. بالتالي الحل الأفضل هو استخدام المدخرات كطريقة لجمع الفلوس اللي محتاجها للاستثمار أو لتحقيق أهداف مالية تانية.

الاستثمار بيسمح لك بـ:

- ادخار الفلوس بشكل فعّال؛ لتحقيق أهداف طويلة الأجل، زي التقاعد. وده هتوصله من خلال الاستفادة من معدلات فائدة أعلى وكمان الفائدة المركبة.

- ضمان إن مدخراتك قادرة تواكب صعوبات التضخم.

- توفير مصدر من مصادر الدخل السلبي.

- تحقيق الحرية المالية وبناء ثروتك الخاصة.

ما هي أساسيات الاستثمار؟

فهم أساسيات الاستثمار من الخطوات المهمة في رحلتك الاستثمارية؛ عشان تكون قادر تاخد قرارات مالية صح وتوصل لأهدافك. وبما إنك لسه في بداية رحلة الاستثمار، هنقولك على مفاهيم محتاج تكون عارفها:

المخاطر والعائد:

كل ما كان العائد اللي ممكن تحصل عليه من استثماراتك أعلى، كل ما زادت المخاطر. والعكس صحيح. الاستثمارات اللي مخاطرها قليلة عادةً بتوفر عائد أقل. محتاج تفهم العلاقة دي بين العائد والمخاطر وانت بتاخد قراراتك الاستثمارية.

توزيع الأصول:

توزيع الأصول في محفظتك الاستثمارية بيعتمد على حاجات منها مستوى تحملك للمخاطر، أهدافك الاستثمارية، والوقت اللي قدامك للوصول للأهداف دي. لو مثلاً الوقت اللي قدامك طويل، زي وصولك لسن التقاعد، ممكن تقدر تتحمل مستوى مخاطر أعلى وتستثمر جزء كبير من استثماراتك في الأسهم.

حركة السوق:

السوق عادةً بيمر بفترات صعود وهبوط، ومهم تعرف أن التقلبات دي جزء طبيعي من الاستثمار. محاولة توقع السوق أو اتخاذ قرارات استثمارية بناءً على حركة السوق لفترة قصيرة ممكن يكون فيها مخاطرة؛ وده بسبب إن صعب جداً تتوقع تحركات السوق بدقة أو تبني قراراتك على أدائه لفترة قصيرة.

الرسوم:

الرسوم اللي بتتفرض على الاستثمارات ممكن تأثر على العائد بتاعك بمرور الوقت. بالتالي لازم تكون عارف الرسوم اللي بتدفعها، زي الرسوم الإدارية، وعمولات التداول، وتفهم ازاي بتأثر على استثماراتك وأدائك.

أهداف الاستثمار

الأمان:

معظمنا أولوية من أولوياته في أي خطوة بياخدها في حياته، هي الأمان. والاستثمار زيه زي باقي خطوات حياتك، انت عايز الفلوس اللي تعبت فيها تكون في أمان وانت بتستثمرها، خاصة لو كنت من المستثمرين اللي بيفضّلوا الاستثمارات قليلة المخاطر. ورغم إن مفيش استثمار آمن 100%، إلا إن في استثمارات درجة الأمان بتاعتها عالية، زي السندات اللي بتصدرها الحكومة واللي بتعتبر استثمارات آمنة؛ والسبب في ده إن الحكومة مش بتنهار كل شوية وبالتالي مفيش داعي للقلق. بالإضافة للنوع ده من السندات، في السندات اللي بتصدرها الشركات وأذون الخزانة اللي بتعتبر آمنة. لو هدفك من الاستثمار هو الأمان، تقدر تختار الاستثمارات اللي بتوفر لك الهدف ده، بس لازم تكون عارف إن عوائد الاستثمارات دي بتكون قليلة مقارنة بأنواع استثمارات تانية.

السيولة:

وجود فلوس كافية للتعامل مع أي حاجة طوارئ تواجهك، جانب مهم في الاستثمار. السيولة هي القدرة على تحويل الأصل لفلوس عن طريق بيع أو تداوله بدون مخاطر كبيرة، والأصول السائلة زي السندات بيكون فيها تأمين للحياة؛ عشان بتقدر تساعدك تلاقي فلوس بسرعة وتغطّي احتياجاتك الفورية بسهولة من خلال تسييل استثماراتك فيها.

أسباب الاستثمار للمبتدئين

كتير من الناس في الوقت الحالي أصبحوا بيلجأوا للاستثمار لتنمية ثرواتهم. لكن ايه الأسباب اللي وراء الاختيار ده؟ وازاي الاستثمار قادر انه يحسّن مواردك المالية؟ تعالى نكتشف مع بعض:

زيادة ثروتك:

الهدف الأساسي من الاستثمار مش بس الحفاظ على ثروتك، لكن كمان زيادتها، سواء على المدى القصير أو الطويل. من خلال توزيع فلوسك بشكل متوازن على أصول مختلفة زي الأسهم، السندات، تقدر تبدأ تزوّد دخلك. وده مع الوقت ممكن يحقق لك أرباح كبيرة.

توفير دخل منتظم:

فيه خيارات كتير ممكن توفر لك دخل منتظم. الدخل ده ممكن يجي بأشكال مختلفة زي الأرباح الرأسمالية، الفوائد، أو الدخل السلبي، زي دخل الإيجار مثلاً. الاستثمار بهدف الحصول على دخل إضافي ممكن يكون طريقة ممتازة لتأمين تدفق نقدي ثابت، يعني مش هتحتاج تعتمد على مدخراتك. واختيار الاستثمار المناسب ليك ممكن يضمن لك مصدر دخل موثوق مع الوقت، ويخلي فلوسك تشتغل ليك.

الجمع بين الشغف والنمو المادي:

كتير من الناس بيشوفوا إن الأمور المالية هي موضوع ممل ومُعقد. لكن ده مش شرط يكون انطباعك انت كمان. فمثلاً في موضوع زي الاستثمار، بدل ما تختار الخيارات التقليدية زي الأسهم أو السندات، ممكن تستثمر في حاجة بتحبها. على سبيل المثال، لو عندك اهتمام بالعقارات، ممكن تشتري عقار وتجدده أو تأجره عشان تكسب دخل سلبي، أو لو انت من عشاق الفن، اكتشف المعارض الفنية المختلفة أو احضر مزادات واختار قطع فنية تستثمر فيها. اختيار حاجة بتحبها ممكن يكون مشروع فيه شغف وربح في نفس الوقت.

تحسين جودة الحياة:

الاستثمار بشكل عام بيهدف لخلق مستقبل وحياة أفضل. كسب دخل وأرباح مستمرين ممكن يحسنوا جودة حياتك، وده بيساعدك تحقق أهدافك الشخصية والمالية، سواء كانت بدء مشروع خاص، دفع مصاريف تعليم أولادك، شراء بيت، أو إنك بس تعيش براحة واستقرار. في الاخر، خطة الاستثمار المدروسة كويس قادرة توفرلك الدعم المالي اللي انت محتاجه عشان تحقق أهدافك.

وسيلة أفضل من حسابات التوفير:

لو عايز المدخرات بتاعتك تزيد مع الوقت، محتاج تحقق عائد يتجاوز معدل التضخم. ده معناه إنه لو سيبت فلوسك في حساب التوفير، ممكن تفقد قيمتها أو مش هتكون قادرة تواكب التضخم اللي بيحصل بشكل كافي. أما الاستثمارات

ازاي ابدأ في الاستثمار؟

بعد ما قريت كل الكلام ده، أكيد دلوقتي بتسأل نفسك: ازاي ابدأ في طريق الاستثمار؟ عادةً المستثمرين بيكوّنوا محفظة استثمارية فيها مجموعة من الاستثمارات المختلفة وبيحتفظوا بيها لسنين. كمان بيكونوا عارفين ان الاستثمار زي الماراثون محتاج صبر وتخطيط. ودلوقتي خلينا نقولك ازاي تبدأ:

1- حدد الأهداف الاستثمارية

أول خطوة تبدأ بيها طريق الاستثمار، هي تحديد أهدافك الاستثمارية. المقصود هنا هو إنك تفهم ليه عايز تستثمر وإيه اللي عايز تحققه؟ هل بتحوّش عشان تقاعد مريح، تدفع مقدم لبيت جديد، لتعليم أولادك، أو حاجة تانية؟

الأهداف المحددة بتساعد المستثمرين المبتدئين إنهم يفضلوا مركزين ومُحفزين، خصوصًا وقت تقلبات السوق. الأهداف دي بتكون زي البوصلة اللي بتوجه قراراتك الاستثمارية وبتساعدك تقيس التقدم اللي بتحققه. كل هدف بيكون له إطار زمني مختلف ومستوى مخاطر مختلف.

2- حدد ميزانية استثماراتك

الخطوة التانية، هي تحديد المبلغ اللي ممكن تستثمره وقدرتك على الاستثمار. مفيش داعي تبدأ بمبالغ كبيرة، حتى المبالغ الصغيرة المنتظمة ممكن تكبر بشكل كبير بفضل الفائدة المركبة. بعد ما تبدأ تستثمر، هتلاقي نفسك عايز تضيف فلوس أكتر لحساباتك، خصوصاً لو عندك أهداف طويلة المدى زي التقاعد. وهنا الخبراء بينصحوا عمومًا بتخصيص 10-20% من دخلك أو تتبع طريقة ميزانية 20/30/50 للاستثمار بشكل منتظم. وبما إن بالنسبة لكتير من الناس، استثمار 10-20% من الراتب مش أفضل اختيار في البداية. فمحتاج تحدد الاختيار المناسب ليك، تبدأ بدري وتستثمر بانتظام حسب قدرتك.

3- فكر في مدى تحملك للمخاطر

كل استثمار فيه نوع من المخاطر. لكن القدرة على التعامل مع المخاطر بتختلف من شخص للتاني. عمرك، دخلك، أهدافك المالية، وعوامل تانية بتلعب دور في تحديد تحملك للمخاطر. عادةً، المستثمرين بيصنفوا تحمل المخاطر إلى 3 فئات:

- مستثمر مُحافظ: وهو شخص بيفضّل الاستقرار على إمكانية الحصول على عائد استثمار أعلى. وتوزيع الأصول عنده غالبًا بيكون 40% أسهم و60% سندات.

- مستثمر حذِر: بيحاول يوازن بين الاستقرار وإمكانية الحصول على عائد أعلى. عادةً بيخصص 60% للأسهم و40% للسندات.

- مستثمر جريء: وهو الشخص المرتاح مع فكرة التعامل مع المخاطر الكبيرة وبيأمل في الحصول على عوائد كبيرة. عادةً بيخصص 80% للأسهم و20% للسندات.

مهم تعرف مستوى تحملك للمخاطر. هل أنت موافق على خيارات عالية المخاطر وعالية العوائد، ولا بتفضل طريقة نمو آمنة وثابتة؟ هل أنت قريب من سن التقاعد، ولا عندك لسه سنين قدامك في الشغل؟ فمدى تحملك للمخاطر هيأثر على أنواع الاستثمارات اللي تختارها.

4- اختار استثماراتك

في الخطوة دي، محتاج تختار استثماراتك بناءً على أهدافك وتحملك للمخاطر. فيه أنواع كتير من الاستثمارات في السوق، معظم المستثمرين العاديين بيحطوا فلوسهم في الأسهم، السندات، صناديق الاستثمار، أو صناديق الاستثمار العقاري. بالنسبة للمستثمرين المبتدئين، صناديق الاستثمار ممكن تكون بداية كويسة؛ لأنها بتوفر تنويع مدمج ومخاطر أقل.

5- تابع وحلل استثماراتك

بمجرد ما تكون بدأت واخترت استثماراتك، بتكون خلاص على أول الطريق وما بقاش لازم تفكر في ازاي تبدأ؛ لأنك بالفعل عديت الخطوة دي. لكن خلي بالك، الاستثمار مش حاجة تقدر تسيبها أو تنشغل عنها، لازم تراجع استثماراتك بانتظام للتأكد إنها بتتماشى مع أهدافك وتعمل التعديلات اللازمة.

ظروف السوق بتتغير، وممكن وضعك المالي أو أهدافك كمان تتغير. ولما تبدأ تستثمر لأول مرة، ممكن تحس إن الموضوع معقد ومربك. لكن ممكن تقوم باستشارة مستشار مالي؛ للحصول على نصائح مخصصة عن كيفية استخدام فلوس الاستثمار لتحقيق أهدافك المالية.

في آخر مقالنا النهارده، حابين نقولك حاجتين، أول حاجة: إنك محتاج تتأكد إنك جاهز للاستثمار قبل ما تبدأ، عن طريق التأكد من شوية مؤشرات، زي وجود دخل فائض عن احتياجاتك الأساسية، عدم وجود ديون بفوائد عالية، ووجود أهداف مالية واضحة.

محتاج كمان تعرف إن الاستثمار مش بالضرورة يكون مُعقد. كل اللي محتاج تعرفه هو فهم أنواع الأصول المتاحة، تحديد أهدافك المالية، فهم مستوى تحملك للمخاطر، إنشاء محفظة استثمارية متنوعة، اختيار منصة استثمار من المنصات الموثوقة والمعروفة، وبدء استثمارك الأول.