تعرف أن أي قرض شخصي ممكن يأثر على الـ I-score بتاعك بطرق مختلفة، منها السلبي ومنها الإيجابي؟ فكرة إنك تاخد قرض شخصي مش بالضرورة تأثر على الـ I-Score بتاعك بشكل سلبي، ولكن ممكن تقلل درجاتك أو تقييمك الائتماني لفترة قصيرة وبالتالي ده يصعّب عليك إنك تاخد أي قروض تانية لحد ما تسدد القرض القديم.
من ناحية تانية، سداد القرض الشخصي في ميعاده ممكن يرفع درجاتك أو تقييمك الائتماني بشكل عام. لو بتفكر تاخد قرض على المدى القريب أو البعيد، لازم تعمل بحث كويس وتقارن بين كل الاختيارات المتاحة وتفهم كويس فكرة القروض وتأثيراتها؛ عشان توصل في الآخر لأفضل قرض مناسب ليك، حتى لو الـ I-Score بتاعك مش عالي أوي.
ما هو مفهوم القرض؟
القرض هو مبلغ بتستلفه من البنك عشان تستخدمه في أغراض محددة، زي تسديد ديون، شراء بيت جديد أو تجديده، التخطيط لمشروع أحلامك. الفلوس أو المبلغ اللي بتستلفه ده بيتم تحديد مدة لسداده وعادةً بيكون عليها فوائد.
محتاج تكون عارف مصطلحات معينة وانت بتخطط تاخد قرض شخصي، زي:
فترة السداد: هي الفترة اللي بتقوم خلالها بتسديد أقساط القرض.
رسوم القروض: هي المبلغ اللي بتدفعه في البداية مقابل الحصول على القرض.
الفوائد: هي النسبة اللي بيتم إضافتها لقيمة القرض الأصلي، ودي بتكون أرباح البنك. وبتختلف الفائدة من بنك للتاني باختلاف طبيعة القرض وتوجيهات البنك المركزي المصري.
أنواع القروض
القروض بتنقسم لنوعين، قروض مضمونة وقروض غير مضمونة.
القرض الشخصي المضمون: بيتطلب نوع من الضمان عشان البنك يوافق على القرض، مثلاً ممكن يكون ضمان القرض بتاعك أصل نقدي، زي حساب توفير أو شهادات البنك، أو أصل مادي، زي عربية أو بيت. وفي حالة عدم تسديدك لأقساط القرض في مواعيدها، البنك من حقه ياخد الضمان ده لتسديدها.
القرض الشخصي غير المضمون: فهو غير مشروط بأي ضمانات. ولأن البنوك بتعتبر النوع ده أكتر خطورة، بتقوم بفرض فوائد عالية عليه.
ازاي أقدم على قرض شخصي؟
في بنوك كتير في الوقت الحالي بتوفر خدمة التقديم أونلاين على القروض، واللي بتكون سريعة ومُريحة. وفي مرحلة التقديم بيكون مطلوب منك معلومات شخصية ومالية، زي اسمك، عنوانك، وظيفتك ومعلومات عن الشركة اللي بتشتغل فيها، ومستندات تانية، زي:
1- البطاقة الشخصية
2- إثبات لمحل الإقامة
3- كشف حساب بنكي أو مفردات مرتب
في حالة قبول طلبك، الخطوة اللي بعدها بتكون مراجعة المستندات الخاصة بالقرض، واللي بتكون عبارة عن مبلغ القرض، سعر الفائدة، مدة السداد، والقسط الشهري. وبعدين في خلال أيام بيتم الموافقة عليه.
ايه هو الـ I-score المطلوب للحصول على قرض؟
قبل ما نتكلم عن الـ I-Score المطلوب عشان يتم الموافقة على القرض بتاعك، محتاج تعرف الخطوات اللي بتحصل وبيتم على أساسها تقييم التصنيف الائتماني أو الـ I-score الخاص بيك.
في وكالة اسمها "وكالة التقارير الائتمانية" ودي مهمتها انها تجمع معلومات عن كل شخص بيقدم على قرض، زي عدد القروض اللي خدها قبل كده وهل هو ملتزم بسداد الأقساط في مواعيدها، وبتسلم الوكالة المعلومات اللي جمعتها للبنك أو الجهة اللي انت عايز تاخد قرض منها. المعلومات دي بتساعد البنوك انها تقيّم الجدارة الائتمانية بتاعتك. الجدارة الائتمانية أو الـ I-Score هو أهم مؤشر بيحدد مدى التزامك بسداد القروض فيما بعد.
