مع وجود بطاقة الائتمان والتسهيلات المالية المتاحة بشكل كبير، أصبح من الشائع إنك تدفع الفلوس بكريدت كارد Credit Card حتى لو كان لشراء حاجة صغيرة. صحيح إن الدفع ببطاقة الائتمان بيكون مريح جداً وفي مواقف معينة ممكن ينقذك، لكن استخدام الكريدت ممكن يكون له أسباب إيجابية وأسباب سلبية.
في الوقت اللي ناس كتير شايفة إن بطاقة الائتمان Credit Card هي الحل السريع لكل حاجة، الحقيقة إنها ممكن تكون سبب لمشاكل مالية كبيرة. بطاقات الائتمان بتخلينا نحس إن الفلوس دايماً في إيدنا، لكن في الواقع، استخدامها بطريقة غلط ممكن يخلي الدين يتراكم والفوائد تزيد، وده طبعًا بيحصل من غير ما نحس.
في المقال ده، هنستعرض شوية أسباب مهمة تخليك تفكر مرتين قبل ما تاخد قرار التقديم على كريدت كارد واستخدامه، خصوصًا لو لسه بتبدأ تبني حياتك المالية.
ايه هي بطاقات الائتمان Credit Cards؟
بطاقة الائتمان أو الكريدت كارد هو كارد بيستخدم بدل الكاش أو كارت الخصم المباشر Debit Card؛ عشان تقوم بعمليات شراء عن طريقه. لما تقدم على كريدت كارد، البنك اللي بيصدره بيحددلك حد ائتماني معين تقدر تستلف منه. ولما تشتري حاجة باستخدام الكريدت كارد، بيتم سحب الفلوس من الحد الائتماني الموجود في بطاقة الائتمان وبيتحدد لك وقت معين تسدد فيه الفلوس دي.
لو قررت تستخدم كريدت كارد Credit Card، يُنصح إنك تدفع الرصيد المستحق بالكامل قبل ميعاد الدفع؛ عشان تتجنب دفع فوائد على المبلغ المتبقي. وكمان في الفاتورة الشهرية، بيكون فيه حد أدنى للدفع.
الفرق بين الكريدت كارد Credit Cards وبطاقة الخصم المباشر Debit Card
بطاقة الخصم المباشر Debit Card بتكون مربوطة بحسابك البنكي بشكل مباشر، يعني لما تشتري حاجة باستخدامها، الفلوس بتقل من حسابك تقريبًا في نفس اللحظة. لكن الكريدت كارد Credit Card، المبلغ اللي بتستخدمه بيتم خصمه من الحد الائتماني المتاح ليك والموجود في الكارد، وبعد كده بتسدد الرصيد المستحق (المبلغ اللي صرفته) في وقت لاحق بيكون محدده البنك معاك من قبلها.
قد ايه استخدام بطاقات الائتمان آمن؟
ده بيختلف طبعاً حسب قدرتك على السداد. ولكن في طريقة كويسة تقدر تقيّم بيها الموضوع، وهي من خلال "نسبة استخدام الائتمان"، وهي عبارة عن المبلغ المستحق اللي عليك في أي لحظة مقارنة بالحد الائتماني المتاح ليك. لو باستمرار بتوصل للحد الأقصى المسموح بيه لبطاقة الائتمان Credit Card بتاعتك، ممكن تكون في طريقك لمشكلة.
9 أسباب تخليك ترفض استخدام بطاقة الائتمان Credit Card
ودلوقتي هنتكلم عن 9 أسباب تخليك تقول لا لبطاقة الائتمان، وممكن تحميك من الوقوع في فخ الديون والمشاكل المالية، وهنكتشف مع بعض ليه بطاقات الائتمان ممكن تكون عبء بدل ما تكون أداة مساعدة في حياتك المالية:
1- إضعاف قدرتك على التحكم في نفسك
لما تكون مش قادر تتحكم في رغبتك في الشراء، ده ممكن يحرمك من الأمان المالي مع الوقت. الأسوأ من كده، إن التسرع في اتخاذ قرارات الشراء ممكن يأثر بالسلب على جوانب تانية في حياتك، زي ثقتك بنفسك، أو اللجوء لسلوكيات ضارة زي إدمان الشراء أو الصرف بشكل عام.
وصحيح إن التحكم في النفس مش دايماً سهل أو ممتع، لكن فوائده كتير، زي إنك تقدر تحقق أهدافك المالية الكبيرة، زي شراء بيت أو التوفير لمستقبلك.
2- دليل على عدم وجود ميزانية شهرية
استخدامك لبطاقة الائتمان غالباً معناه إنك عايش بدون ميزانية شهرية. ومن غير ميزانية، ممكن بسهولة تنسى إنك بتحاسب على حاجات صغيرة زي قهوة هنا أو كتاب جديد هناك، لكن كل ده بيتجمع على مدار الشهر ويدخّلك في مشاكل. الميزانية بالنسبة لكتير من الناس هي أداة مهمة لضبط المصاريف الشهرية.
وفي حالة إنك معندكش ميزانية، متقلقش، عمل ميزانية أسهل بكتير مما تتخيل. الموضوع ببساطة عبارة عن إنك تكتب قائمة توضح فيها دخلك الشهري، وتعمل حِسبة لكل المصاريف اللي بتصرفها. في النهاية، الباقي هو اللي هيقولك تقدر تصرف قد إيه من غير ما تحط نفسك في مأزق.
