يعتبر الاستثمار وسيلة فعّالة للوصول للحرية المالية وتحقيق أحلامك. بس قبل ما تبدأ رحلتك في عالم الاستثمار، مهم تكون متأكد إن عندك خطة واضحة وأهداف مالية مُحددة.
تحديد الأهداف المالية بيساعدك تعرف أولوياتك وبالتالي تعرف الطريق الصحيح اللي محتاج تمشي فيه، وكمان بيديلك الفرصة إنك تقيّم مدى نجاحك في تحقيق الأهداف دي مع الوقت. في المقال ده هنساعدك تعرف ازاي تحدد أهدافك المالية بشكل واضح ومناسب وكل حاجة محتاج تعرفها وتحددها قبل ما تبدأ طريق الاستثمار عشان تضمن إنك ماشي في الاتجاه الصح.
ليه تحدد الأهداف المالية قبل الاستثمار؟
الخبراء الماليين عملوا تشبيه بسيط بين تحديد الأهداف المالية وتحضير خطة السفر لأي مكان. في الحالتين، بتكون محتاج تحدد نقطة البداية والنهاية، الإطار الزمني الخاص برحلتك أو أهدافك، وتقدير التكلفة المتوقعة. نفس الكلام نقدر نطبّقه على الاستثمار، لو مفيش عندك أهداف واضحة، سهل إن فلوسك تخرج عن السيطرة وتلاقي نفسك في وضع مالي صعب.
وبالتالي، لما تيجي تحدد أهدافك الاستثمارية، مهم تعرف حاجتين: مدى تقبلك للمخاطر في الاستثمار والمدة الزمنية اللي بتخطط للاستثمار فيها:
حدد مدى تقبلك للمخاطر
مدى تقبلك للمخاطر هو عبارة عن القَدر اللي تكون مستعد أو قادر تتحمله من المخاطرة لما تستثمر في أنواع استثمارات، زي الأسهم والسندات. لو عندك تقبل عالي للمخاطر، ده معناه إنك مُتقبل نسبيًا مع فكرة خسارة الفلوس مقابل فرصة تحقيق عوائد أعلى. وده بيصنفك في عالم الاستثمار، بإنك مستثمر جريء.
لكن لو تقبلك للمخاطر منخفض، هتفضّل الاستثمارات اللي بتحافظ على قيمتها أو مش بتفقدها بسهولة، وده معناه إنك مستثمر محافظ. وبالتالي، لو عندك وقت أطول للاستثمار تقدر خلاله تتعافى من أي خسارة محتملة، تقدر تستثمر بجرأة أكتر. لكن لو محتاج الفلوس في وقت قريب ومش هتقدر تجازف بخسارتها، هتحتاج تكون مُتحفظ أكتر.
حدد مدة الاستثمار
مدة الاستثمار هنا بتشير إلى الفترة الزمنية اللي ناوي تحتفظ فيها باستثماراتك قبل ما تبيعها لتحقيق هدف مُعين. ممكن تكون المدة دي شهور أو سنين. مدة استثمارك بتتحدد حسب أهدافك المالية. يعني مثلاُ لو ناوي تشتري بيت خلال الخمس سنين الجايين، يبقى مدة استثمارك للمبلغ اللي بتستثمره عشان البيت هي 5 سنين. لكن لو هدفك إنك تتقاعد بعد 25 سنة، يبقى مدة استثمارك هتطوّل لحد 25 سنة. كل ما كان الهدف كبير، كل ما طالت مُدة الاستثمار.
5 خطوات لتحديد أهداف مالية واقعية
1. راجع وضعك المالي
عشان تحدد أهدافك المالية، لازم تعرف انت تقدر توفر قد ايه لكل هدف بناءً على مصاريفك الحالية. والأفضل كمان إنك تشوف تقدر تزوّد المبلغ اللي بتوفره بنسبة قد ايه لو قدرت تقنن مصاريفك وقللت المصاريف غير الضرورية. مهم إنك تراجع راتبك، مصاريفك، وديونك، وبعدها تحط ميزانية تساعدك تسيطر على أمورك المالية وتلاقي طرق لتوفير الفلوس.
2. قسّم أهدافك المالية
قسّم أهدافك المالية لـ 3 فئات، قصيرة، متوسطة، وطويلة المدى:
- أهداف قصيرة المدى: زي إنك توفر مبلغ كافي للسفر لرحلة مع عيلتك. الخبراء مختلفين في مدة الأهداف قصيرة المدى، في منهم بيقولوا أقل من سنة، وفي تانيين بيقولوا أقل من شهرين.
- أهداف متوسطة المدى: زي توفير مُقدم بيت جديد. مُدتها من 3 لـ 5 سنين.
- أهداف طويلة المدى: بتكون كبيرة وبتاخد سنين، زي التخطيط للتقاعد أو تعليم أطفالك. بتبدأ من 5 سنين.
حدد أهداف استثمارية واضحة وقابلة للقياس سواء قصيرة، متوسطة أو طويلة المدى. مثلاً، بدل من إنك تلتزم بتوفير فلوس بس، حاول تخلّي الهدف مُحدد أكتر، زي استثمار 30,000 جنيه على مدار السنتين الجايين.
