عادةً الموضوعات اللي بتكون عن الفلوس بتكون مختلفة وأفكارنا فيها بتتفاوت حسب أهدافنا وخططنا. ولما نتكلم عن الفلوس، محتاجين نتكلم عن الاستثمار والادخار والفرق بينهم، وكمان نطرح أسئلة مختلفة، زي إيه هي أفضل الطرق لتوفير الفلوس؟ أو هل الأفضل استثمار الفلوس بدل من ادخارها؟ وهل في فروق كبيرة بين الاستثمار والادخار؟
معرفتك بالاختلافات بين الاستثمار والادخار ومزايا كل واحد فيهم قادرة تساعدك بشكل أفضل في تحديد الطريق للوصول إلى أهدافك المالية. في مقال النهارده هنتعرف على الاختلافات بين الاستثمار والادخار والنقاط المهمة اللي محتاج تعرفها قبل ما تاخد القرار الأفضل لفلوسك.
ما هو الاستثمار؟
الاستثمار هو وسيلة لزيادة فلوسك بمرور الوقت من خلال تشغيلها في أدوات مالية مختلفة، زي الأسهم، والسندات، وصناديق الاستثمار. وعلى الرغم من إن الاستثمار فيه نسب من المخاطر، إلا إنه بيتميز بقدرته على كسب عائد أعلى على المدى الطويل.
الاستثمار هو وسيلة للوصول إلى الأهداف المالية طويلة الأجل، زي دفع مقدم بيت جديد، أو تأمين حياتك في فترة التقاعد، أو شراء عربية جديدة. وبما إن الاستثمار فيه نسب مختلفة من المخاطر، محتاج تختار نوع الاستثمار المناسب لأهدافك والفترة اللي تقدر تستثمر فيها. وبشكل عام، كل ما كانت فترة الاستثمار أطول، كل ما زادت قدرتك على تحمل المخاطر؛ بسبب وجود الوقت الكافي للتعويض والتعامل مع تقلبات السوق.
مثلاً، لو عايز تستثمر في شركة من شركات العقارات، عن طريق شراء أسهمها، هتكون مالك لجزء صغير من الشركة، وبالتالي هتستفيد من نموها وأرباحها. لو أوراسكوم حققت أداء جيد، قيمة السهم بتاعها هتزيد، وبالتالي ممكن تبيع الأسهم الخاصة بيك فيها بربح.
مع كل المميزات دي، أنت محتاج دايماً تفكر نفسك إن الاستثمار خالي من الضمانات، وفي دايماً مخاطرة خسارة فلوس. فمثلاً، لو الشركة دي أفلست، استثمارك ممكن يبقى بدون قيمة تقريباً. عشان كده مهم إنك تنوع محفظتك الاستثمارية، وتستثمر في شركات ومجالات مختلفة عشان تقلل المخاطر.
فوائد الاستثمار
يتميز الاستثمار بقدرته على تحقيق عوائد أعلى من حسابات التوفير؛ وزيادة الثروة الخاصة بيك مع الوقت عن طريق الفائدة المركبة وإعادة الاستثمار، كمان بيساعدك توصل للأهداف المالية طويلة المدى، زي شراء بيت أو عربية، أو تأمين فترة التقاعد. لكن زي ما ليه مميزات، الاستثمار ليه سلبيات محتاج تاخد بالك منها، الاستثمار دايماً فيه مستوى من المخاطر، ومفيش ضمان لإنك فلوسك هتزيد أو حتى هتقدر تسترجع الفلوس اللي استثمرتها.
تقدر تقلل المخاطر عن طريق تنويع محفظتك الاستثمارية. أهم خطوة إنك تبحث وتتعلم مخاطر كل نوع من الاستثمارات.
ما هي مزايا وعيوب الاستثمار؟
1) مزايا الاستثمار:
- احتمالية أكبر في تحقيق عائد أعلى من حسابات التوفير.
- تحقيق أهداف مالية طويلة الأمد.
- التنويع في الاستثمارات بيقلل من نسبة المخاطر.
- مواكبة تقلبات التضخم.
2) عيوب الاستثمار:
- احتمالية وجود مخاطر الخسارة خاصةً على المدى القصير.
- محتاج متابعة مستمرة وانضباط في مبالغ الاستثمار.
- محتاج فترات زمنية طويلة عشان تقدر تشوف عائد مُرضي ليك.
