4- عدم تحديد أهداف مالية واضحة
لو مش بتقوم بوضع وتحديد أهداف واضحة أو قابلة للقياس في المستقبل، هيكون أصعب عليك إنك تحط ميزانية، تدخر، أو تدير فلوسك بشكل عام في الوقت الحالي. الغلطة دي ممكن تكلفك أكتر على المدى الطويل، زي إنك تتجاهل مدخراتك أو تصرف منها على المدى الطويل، أو تصرف بشكل زائد عن الحاجة على حاجات بتدّي متعة مؤقتة، أو عدم سدادك الديون اللي عليك واللي ممكن الفوائد عليها تزيد مع الوقت.
الأهداف المالية بتختلف من شخص للتاني حسب احتياجات ورغبات كل واحد فينا، بس المهم إنك تاخد وقتك وتكتب الأهداف دي وتقوم بوضع خطة عمل عشان تحققها في فترة زمنية واقعية.
5- عدم وجود صندوق لمصاريف الطوارئ
المفاجآت بتحصل لأي حد ووارد تكون غير سعيدة، فمثلاً ممكن الموبايل يبوظ فجأة أو العربية تعطل بيك بدون مقدمات وتكون محتاجة مبلغ كبير عشان تتصلح. وبما إننا مش بنقدر نتوقع المستقبل، محتاج تخطط من دلوقتي للحظات دي وتبدأ في في إنشاء صندوق للطوارئ.
مهم كمان تعرف إن لما بيكون عندك مبلغ بسيط محطوط على جنب للطوارئ، حتى لو كان صغير، مش بس بيساعدك تتفادى الديون اللي ممكن تقترضها من بطاقات الائتمان، لكن كمان بيخفف شوية من التوتر اللي بيجي مع التعامل مع الموقف نفسه.
6- عدم استغلال هواياتك
في مصطلح مشهور اسمه الـ Side hustle وبيعبر عن الهوايات أو المشاريع الصغيرة اللي ممكن تشتغل عليها في أوقات فراغك وتساعدك تكسب فلوس أكتر. الطريقة دي بتعتبر من الطرق الممتعة اللي ممكن تكسب بيها فلوس باستخدام هواياتك أو مواهبك ووقتك الفاضي.
لو بتعرف ترسم أو تعمل إكسسوارات، جرب تبيع شغلك أونلاين أو في معارض الحرف اليدوية. ولو بتحب الموضة، ممكن مثلاً تبدأ مشروع خياطة بسيط من البيت. مهما كان نوع الـ side hustle اللي تختاره، استغله في إنه يكسّبك فلوس زيادة ممكن تساهم بشكل كبير في زيادة مدخراتك.
7- الاعتماد الدائم على بطاقات الائتمان
من أسهل الحاجات اللي بنعملها بشكل مستمر، هي إننا نضيف مشتريات على بطاقات الائتمان من غير ما نفكر كتير. الاعتماد الكتير على بطاقات الائتمان في المصاريف اليومية ممكن يتحول لعادة تؤدي لزيادة الفوائد أو الديون، أو تدهور الـ I-Score بتاعك.
بدل ما تعتمد على بطاقات الائتمان في كل عملية شراء، جرب تدفع المشتريات البسيطة بالفلوس الكاش. كمان ممكن تفكر تستخدم كارت الخصم المباشر Debit card بدل بطاقة الائتمان. بس خد بالك إنك ماتقعش في نفس العادات السيئة مع كارت الخصم المباشر؛ لأن المشتريات من خلاله بتتسحب على طول من حسابك البنكي وبالتالي الخسارة فورية.
8- القيام بمخاطر غير محسوبة
واحدة من المجلات المشهورة، زي "مجلة فوربس" بتقول: المخاطرة جزء أساسي من الاستثمار السليم. من غير مخاطرة، مفيش عائد. المخاطر المحسوبة في عمر العشرين ممكن تكون تجربة صحية تساعدك تجهز نفسك للتحديات اللي جاية.
زي إنك تستثمر جزء من فلوسك في البورصة أو تاخد قرض عشان تفتح مشروع صغير، دي أمثلة على مخاطر محسوبة ممكن تحس إنها خطرة في البداية، لكنها ممكن تعود عليك بنتيجة مع الوقت. مهم كمان تفهم إن الفلوس اللي هتستثمرها في البورصة أو في مشروع جديد ممكن تخسرها، عشان كده لازم توازن كويس بين المخاطر والمكاسب قبل ما تاخد أي خطوة.
وبالتالي المخاطر المحسوبة ممكن تعلمك كتير عن إدارة شئونك المالية وتقيّم قدرتك على تحملها، واللي بدوره ممكن يساعدك تاخد قرارات صح لبناء ثروتك، تنمية مدخراتك، واستثمار فلوسك بذكاء.
9- عدم بناء I-Score جيد
تعرف أن بناء I-Score جيد في العشرينات ممكن يحدد عدد الفرص اللي هتكون متاحة ليك لما تكبر؟ لو مفيش I-Score ليك أو عندك I-Score سيئ، البنوك والجهات المالية ممكن ترفض تمنحك القروض اللي محتاجها عشان تحقق أهداف مستقبلية كبيرة.
وعشان تبدأ تبني I-Score كويس، جرب تعمل الحاجات دي:
- ادفع فواتيرك بالكامل في وقتها.
- حافظ على إن رصيد بطاقة الائتمان يكون مش كبير.
- قدم على بطاقة ائتمان جديدة بس لما يكون ضروري جدًا.
- راقب الـ I-Score بتاعك بانتظام.
10- الاقتراض بغرض شراء كماليات
فكرة إنك تقرر تستخدم بطاقة الائتمان عشان تشتري موبايل بأحدث التقنيات ممكن تبان حلوة في وقتها. لكن لما يوصل ميعاد دفع الأقساط ومتعرفش تسددها، ممكن تندم على إنك دخلت في ديون عشان حاجة مش أساسية. حاول تتفادى شراء كل ما يعتبر كماليات.
السيناريو الأفضل هو إنك توفر الفلوس مع الوقت عشان تقدر تشتري الحاجة من غير ما تهدم ميزانيتك أو تدخل في ديون. معنى كماليات إنها حاجات غير أساسية، ولازم تفكر في شرائها بس لو معاك فلوس زيادة عن حاجتك تكفي دفعها بالكامل. وبالتالي خليها هدف ادخار للمستقبل بدل ما تكون خطر على استقرارك المالي دلوقتي.
رغم سرعة وطيش عمر العشرينات وإن في عوامل كتير ممكن تكون خارجة عن سيطرتك، إلا إنه من الحكمة إنك تحاول تراجع وضعك الحالي وتعمل خطة مالية مُحكمة. وارد تحس إن مفيش حاجة تقدر تغيرها، أو إن مفيش فائض في ميزانيتك أو حاجة تقدر تقللها. لكن بالنسبة لناس كتير، في حاجات صغيرة ممكن تتغير. يمكن تكون بتصرف أكتر من اللازم، عشان كده خليك صادق مع نفسك. راجع كشف حساب بطاقة الائتمان، اعمل ميزانية واقعية وحاول تلتزم بيها، ولو ما قدرتش في الأول، وده بيحصل لمعظم الناس، اسمح لنفسك بغلطات بسيطة وحاول تاني.
وأخيرًا، لو تقدر، حاول تخلي الادخار جزء من أولوياتك. ممكن ما يكونش عندك القدرة تدخر كتير دلوقتي، لكن المهم تخلّي عندك روح إيجابية وتستمر في المحاولة.
