مين فينا معندوش فكرة إن توفير الفلوس أو الادخار هي واحدة من الجوانب الأساسية لبناء ثروة والوصول لمستقبل مالي آمن؟ بس اللي مانعرفوش إن ده مش الميزة الوحيدة للتوفير، الادخار بيأمنلك طريقة تخرج بيها من حالة التوتر الدائم اللي غالباً بيكون سببها الفلوس وبالتالي يوفرلك فرصة تستمتع فيها بحياتك.
الادخار أو توفير الفلوس بيساعدك تحقق أهداف حياتك وتكون جاهز لأي طوارئ، كل ما قدرت توفر أكتر كل ما زادت مدخراتك. وفي مقال النهارده هنتنتاقش بالتفصيل عن أهمية الادخار ونصائح عملية تقدر بيها تقلل مصاريفك وتأمّن مستقبلك.
أهمية الادخار
تبني عادة جديدة زي الادخار أو توفير الفلوس بيكون صعب في الأول زي أي عادة تانية؛ وده لإنها بتحتاج ضبط نفس، وقوة إرادة، ورحلة معرفة بتتلخص في قدرتك على التفريق بين الاحتياجات والرغبات، وإلغاء مفهوم إن العروض فرصة وإنها بتوفرلك فلوس على المدى الطويل!
طب ليه توفر فلوسك أو تبدأ تلجأ للادخار في حياتك؟ للأسباب دي:
1- بيوفرلك راحة البال
لما بتوصل لمرحلة إن أصبح عندك مدخرات أو فلوس موفرها بعيدة عن مصاريفك، بتبقى داخلياً حاسس بإنك بنيت شبكة أمان كبيرة تقدر تعتمد عليها في أي حالة طوارئ أو مصاريف مفاجئة، كمان بتقل أفكار القلق وإحساس التوتر اللي بتحس بيهم لما بتفكر في مواقف مختلفة، زي التعب المفاجئ. عشان كده الادخار مهم وصحّي وبيوفرلك شعور دائم من الأمان وتقليل الضغط النفسي على المدى الطويل.
2- بيساعدك تحقق أحلامك وأهدافك
مين فينا مابيحلمش يكون عنده فلوس زيادة عن حاجته ويكون قادر يوصل لأحلامه وأهدافه بدون القلق من المصاريف؟ سواء كنت عايز تبدأ رحلة الادخار عشان تشتري بيت أحلامك، أو تسافر تلف أوروبا، أو لأي هدف تاني، شعور إنك عندك مبلغ من المدخرات مأمن بيه نفسك، بيمنحك شعور من الاستقلالية المالية والقدرة على الاستمتاع بحياة مريحة بدون اللجوء إلى بطاقات الائتمان أو القروض.
3- بيوصلك للمرونة اللي بتحلم بيها في شغلك وحياتك
بتفكر تسيب الوظيفة المعتادة من 9 لـ 5 وتبدأ شغلك الخاص اللي بيتميز بمرونة أكتر أو مثلاً عايز تكون انفلونسر وتبدأ تركز على إنشاء محتوى خاص بيك؟ الأفكار دي بتكون مثيرة بس في نفس الوقت محتاجة شجاعة؛ لإن حياتك بالكامل هتتغير. بس الأكيد إنك مش محتاج بس الشجاعة، انت كمان محتاج أساس مالي قوي تقدر تعيش من خلاله لحد ما تقف على أرض صلبة في شغلك الخاص.
وجود فلوس جانبية انت مدخرها بتساعدك تمشي في طريق شغلك الخاص بثقة وانت عارف ان عندك الدعم المالي اللي ممكن تلجأله في أي وقت، وبالتالي تشتغل براحة بال وثقة عشان توصل لحلمك.
4- بيساعدك تأمن مستقبل أفضل لعيلتك
رغبتك كأب وزوج في توفير مستقبل أفضل لعيلتك بيكون دافع قوي عشان تبدأ في الادخار؛ لإنك ببساطة عايز تضمن توفير احتياجاتهم المستقبلية، زي الاستثمار في تعليم أطفالك، وتأمين حياتهم الصحية، وده مش هيتحقق غير من خلال بناء مستقبل مادي مستقر وقوي.
5- بيساعدك في تأمين حياتك بعد التقاعد
من خلال الادخار هتقدر تأمن حياتك وتعيش في نمط الحياة اللي انت عايزه حتى بعد التقاعد أو المعاش. مش محتاج تكون كبير في السن أو قربت على المعاش عشان تبدأ تدخر أو توفر فلوسك. كل ما بدأت بدري، كل ما كان للمدخرات بتاعتك وقت تنمو فيه أكتر وتضمن فترة تقاعد مريحة وآمنة.
