ممكن تكون سألت نفسك كتير "معنى الاستثمار وأهميته؟"، وفي الوقت اللي الإجابة فيه محتاجة شرح بالتفصيل، إلا إن أهم ميزة للاستثمار هي الاستقرار المالي. من المتعارف عليه إنك تقدر تكسب الفلوس بطريقتين: إما تشتغل في شركة أو مكانٍ ما أو تشتغل على مشروعك الخاص، ولكن الطريقة المشهورة حالياً واللي أثبتت فعاليتها، هي تشغيل الفلوس الخاصة بيك عشان تزيد معاك وتقدر تحقق ده من خلال الاستثمار.

في المقال ده هنناقش مفهوم الاستثمار، وأهميته، وازاي تبدأ من خلال تطبيق أفضل النصائح العملية اللي هتقدمها ليك ماني فيللوز.

ما هو الاستثمار؟

الاستثمار هو الطريقة الفعّالة لوضع فلوسك في أصول مختلفة بهدف زيادة الدخل وتحقيق الأهداف المستقبلية. الاستثمار ليه أشكال مختلفة، زي الصناديق المشتركة، وأذون الخزانة، والأسهم، والسندات، والعقارات، وغيرها من أشكال الاستثمار. وكل ما كانت مدة استثمارك أطول، كل ما زاد العائد.

ما هو الهدف من استثمار المال؟

رغم أهمية وجود مصدر دخل ثابت ليك كل شهر، إلا إن خطوة ادخار الدخل ده أو جزء منه في حساب البنك فقط، مش هتكون كافية لبناء الاستقرار المالي اللي بتحلم بيه؛ بسبب التضخم وقيمة الفلوس اللي بتقل مع الوقت، وبالتالي انت محتاج لتشغيل الفلوس دي باستمرار لزيادتها.

الاستثمار هيساعدك على المدى الطويل في التغلب على التضخم، وتشتري البيت أو العربية اللي بتحلم بيهم، تأمين مستقبل طفلك، أو تأمين خطة التقاعد الخاصة بيك.

فوائد الاستثمار

1- العائد الجيد على استثماراتك:

أكبر فائدة للاستثمار هي العائد اللي بتحققه على المدى الطويل. ببساطة لو استثمرت صح، وقدرت تستثمر باستمرار ومن بدري، هيكون العائد مُرضي ليك. بالرغم من إن ادخار أموالك في البنك هو الاختيار الأضمن والمتعارف عليه بين العائلات المصرية، إلا إنه مش دايماً بيكون أحسن اختيار بسبب قيمة الفلوس والتضخم، وغيرها من الظروف.

سواء قررت تستثمر في الصناديق المشتركة، الأسهم، السندات، أو العقارات، محتاج تحدد أهدافك ومستوى المخاطرة اللي تقدر تتعامل معاه. وكمان محتاج تختار إذا كنت هتستثمر بنفسك أو هتستعين بمستشار مالي.

2- فرصة لتحقيق أهدافك المالية:

واحدة من نقاط قوة الاستثمار، هي قدرته على مساعدتك في تحقيق أهدافك. بمجرد وضع أهدافك المالية والمستقبلية في الاعتبار، والوقت اللي محتاجة لتحقيقها، ودرجة المخاطرة اللي تقدر تتحملها، تقدر تبدأ في الاستثمار.

محتاج تعرف إنك مش محتاج يكون معاك مبلغ كبير عشان تبدأ تستثمر، الاستثمار بقى أسهل وتقدر تبدأ بمبلغ صغير وتكبره مع الوقت أو مع زيادة ثقتك في استثماراتك ومصدرها.

3- سهولة الحصول على المشتريات الضخمة:

من أكبر مميزات الاستثمار، تسهيل الحصول على المشتريات الضخمة، زي شراء سيارة، أو بيت، أو دفع مصاريف تعليم أطفالك، أو السفر. الاستثمار الجيد هيساعدك في الحصول على الحاجات دي بدون ما تحتاج إلى القروض أو اللجوء للفلوس الموجودة في حسابك البنكي.

4- التخطيط إلى التقاعد:

الاستثمار كمان بيساعدك في بناء ثروة أو مبلغ جانبي تأمن بيه نفسك وعيلتك وقت التقاعد. من خلال الاستثمار في أنواع الاستثمارات المختلفة، هتقدر تشتغل على خطة تقاعد طويلة المدى وتستفيد من العوائد اللي بتوفرها لك استثماراتك.

5- التغلب على التضخم:

التضخم هو أكبر عائق ممكن تقابله في رحلتك للوصول إلى الاستقلال المالي. ببساطة هو السبب الرئيسي في قلة قيمة فلوسك وزيادة التكلفة على كل السلع والخدمات اللي بتحتاجها في حياتك. بعض الاستثمارات، زي الذهب، بتقدر تساعدك تتغلب على التضخم وتمنحك فائدة بمعدل أعلى من معدلات التضخم، وده أكيد عكس اللي بتواجهه مدخراتك في البنوك.

6- الاستثمار هو صندوقك للطوارئ:

كلنا بنتعرض لحالات طارئة في حياتنا، سواء كانت حالة طبية، أو فقدان وظيفة، أو أزمة مالية. الاستثمار بيساعدك في مواجهة المشاكل المالية المختلفة؛ لإنك تقدر تلجأ للفلوس اللي بتقوم باستثمارها من غير ما تقلق على المبلغ المتبقي اللي هيفضل شغّال في استثماراتك بدون توقف.