مشكلة التضخم بتزيد ومسببة لينا مشاكل مختلفة. كتير من المستثمرين بيدوّروا على اختيارات استثمارية مختلفة، زي الذهب، عشان يحافظوا على قيمة استثماراتهم ومحافظهم الاستثمارية. وصحيح أن الاستثمار في الذهب ممكن يكون فيه شوية تحديات؛ بسبب التنوّع في أنواع الذهب المتاحة، إلا إنه ليه مميزات مختلفة لناس كتير.

على مر التاريخ كان الذهب نوع من أنواع الاستثمارات اللي بتساعد الناس تواجه أنواع مختلفة من المشاكل، زي التضخم والاضطرابات الاقتصادية، وحتى التقلبات اللي بتحصل وقت الحروب. عشان كده في وقتنا الحالي بنلاقي إن مستثمرين كتير بدأوا يتجهوا لشراء الذهب.

الاستثمار في الذهب غير مقتصر على الذهب المادي، زي السبائك، أو الجنيه الذهب، تقدر تستثمر في صناديق الاستثمار في الذهب اللي أصبحت متاحة في العديد من شركات الاستثمار الموجودة دلوقتي. في المقال ده هنساعد أي شخص مبتدئ انه يعرف كل حاجة عن الذهب والاستثمار فيه.

كيفية الاستثمار في الذهب

في طرق كتير تقدر تستثمر بيها في الذهب وتكوّن الثروة اللي انت بتحلم بيها. بس قبل ما تبدأ مهم تفكر في خطتك الاستثمارية وتتأكد أنها متوافقة مع الأهداف الاستثمارية الخاصة بيك وكمان تتأكد من مدى تحملك للمخاطر.

ما هي أفضل أنواع الاستثمار في الذهب؟

1- سبائك الذهب

لما الناس بتفكر في الاستثمار في الذهب، أول فكرة بتيجي في بالهم هي الاستثمار في السبائك الكبيرة اللي يقدروا يحتفظوا بيها في الخزنة سواء في البيت أو البنوك. سبائك الذهب بتتراوح في الحجم والوزن من 1 جرام إلى 100 جرام. وبما إن سعر الذهب أصلاً عالي، ده بيخلّي الاستثمار في السبائك مُكلف جداً.

بسبب السعر العالي للسبائك، مهم إنك تشتري من تاجر أو محل ذهب موثوق فيه وتأمن عليها. أو تقوم بتأجير خزنة في بنك من البنوك لتخزين السبيكة والحفاظ عليها. ولو قررت تستثمر في الذهب من خلال السبائك، الأفضل إنك تتابع سعر الذهب باستمرار، عشان تعرف تشتري في الوقت المناسب. لأن ببساطة معظم محلات الذهب بيحدثوا أسعارهم بناءً على الأسعار اللحظية للذهب.

2- الجنيه الذهب

الجنيه الذهب بتختلف أوزانه من 16/1، و8/1، و4/1، و2/1، وجنيه كامل. لكن كمان ممكن تلاقي 5 جنيهات ذهب في جنيه واحد. كمان بيتم تصنيع الجنيه الذهب عيار 21 جرام بوزن 8 جرام وبنسبة نقاء 87.5% من الذهب والباقي من النحاس. في حالة إنك متوفر معاك مدخرات أو مبالغ صغيرة، بننصحك بالاستثمار في الجنيهات الذهب أفضل من سبائك الذهب الصغيرة.

السبائك اللي حجمها صغير، بيتم احتساب مصنعية عليها أعلى من الجنيه. لكن لو كان متوفر معاك مبلغ كبير للاستثمار، الأفضل إنك تشتري سبائك الذهب الكبيرة؛ لتحقيق عائد أعلى.

3- مجوهرات ذهبية

ممكن كمان تفكر تستثمر في مجوهرات من الذهب تقدر تلبسها. بس مهم تعرف إن الاستثمار في أي مجوهرات ذهبية فيه درجة أكبر من المخاطرة مقارنة بالاستثمار في الذهب الخام.

أول حاجة، محتاج تكون حريص جدًا وأنت بتشتري مجوهرات؛ لأن مش كل المجوهرات بتتباع عند محلات ذهب موثوقة. وده عشان مهم تكون واثق في أي قطعة ممكن تبيعها لأي حد في المستقبل. للسبب ده، مهم تشتري المجوهرات اللي هتستثمرها من محل ذهب موثوق وتحصل على كل المستندات الممكنة لحفظ حقك.

تاني حاجة، إنك هتدفع زيادة في السعر بناءً على الشركة اللي صممت وصنعت المجوهرات اللي انت عايزها. الزيادة دي ممكن تبقى من 20% لغاية أكتر من 3 أضعاف قيمة الذهب الخام. كمان محتاج تكون عارف نقاوة الذهب في أي مجوهرات بتشتريها، وده معناه نسبة الذهب فيها قد ايه. نقاوة الذهب بتتحسب بالقيراط، و24 قيراط يعني 100% ذهب. النقاوة الأقل بتقلل من قيمة الذهب اللي في القطعة في حالة تم صهرها وتحويلها لذهب نقي.

4- صناديق الاستثمار في الذهب

الاستثمار في صناديق الذهب ممكن يوفر لك فرصة للاستفادة من استقرار الذهب على المدى الطويل، وفي نفس الوقت يوفر لك سيولة أكبر من الذهب المادي وتنوّع أكتر من الأسهم الفردية لشركات الذهب. كمان تقدر تبدأ بمبالغ صغيرة بدون حد أقصى، مع ضمان التعامل في ذهب موثوق ومعتمد.

نوع الاستثمار ده كمان بيساعد في تقليل بعض التكاليف المرتبطة بشراء الذهب نفسه، زي المصنعية. الصناديق كمان بتوفر لك خدمات حفظ الذهب في أماكن معتمدة ومسجلة في الهيئة العامة للرقابة المالية، وده وبالتالي بيضمن حماية ممتلكاتك من السرقة أو التلف.

مميزات الاستثمار في الذهب

لأن الذهب واحد من أكتر المعادن الغالية شعبية، تعالى نعرف ايه هي مميزاته الرئيسية:

- تنويع المحفظة الاستثمارية: الاستثمار في الذهب وإضافته إلى محفظتك الاستثمارية ممكن يساعد في تنويعها. فكرة امتلاكك لمحفظة بتحتوي على مزيج من أنواع الأصول، العملات، وغيرها من العناصر المختلفة، ممكن يساعد في توزيع المخاطر ويعلّي نسبة تحملك ليها.

- توفير السيولة: الذهب بيعتبر بشكل عام عالي السيولة، يعني تقدر تشتري وتبيع الذهب بسهولة وبدون تأخير. طبعاً السيولة بتختلف من منتج لآخر.

- الحفاظ على القوة الشرائية: بالمقارنة مع الأصول التانية، زي الفلوس، الذهب غالباً بيحتفظ بقيمته على مدار السنين.

عيوب الاستثمار في الذهب

لكل حاجة في الدنيا بشكل عام مزايا وعيوب، والذهب زي ما ليه مزايا، في آراء استثمارية مختلفة بتوضح إن فيه عيوب ومخاطر، ومن أبرزها:

- تقلب الأسعار: رغم أن الذهب بيحافظ على قيمته على المدى الطويل، إلا أن أسعاره ممكن تكون متقلبة جداً على المدى القصير.

- المخاطر: بالرغم من أن البعض بيعتبر الذهب استثمار آمن نسبياً، إلا أن كل الاستثمارات، ومن ضمنها الذهب، بتحتوي على مستوى معين من المخاطر.

نصائح للاستثمار في الذهب

1- التزم بالاستثمارات المعيارية: 

الاستثمارات المعيارية هي الاستثمارات اللي بتكون معتمدة على معايير أو مواصفات محددة ومعروفة مسبقاً. وفي حالة الذهب، تقدر تشتري عملات ذهبية أو مجوهرات أو مقتنيات أخرى بطرق مختلفة، لكن كاستثمار خالص، من الأفضل الالتزام بالخيارات المعيارية اللي تحتوي على نسبة محددة من الذهب، مثلاُ سبائك الذهب بتعتبر خيار شائع لأن؛ سبائك الاستثمار لازم تكون على الأقل 99.5% ذهب، وبالتالي تعرف بالضبط انت بتشتري ايه.

2- اشتري من محلات ذهب موثوقة:

لما تيجي تشتري ذهب، حاول دايماً تشتريه من محلات ذهب موثوق فيهم. ممكن تلاقي ذهب في محلات أونلاين، لكن الخطر في الحالة دي إنك ممكن تدفع أكتر من القيمة الحقيقية، وبالتالي يكون يتنصب عليك. الأحسن إنك تشتري من محل ذهب انت تعرفه أو سمعته معروفة بشكل عام؛ لأن ده بيكون أأمن بكتير.

3- استشير مستشار مالي:

قبل ما تقرر إنك تعمل أي تغيير في محفظة استثماراتك، فكر إنك تقابل مستشار مالي الأول. هو هيقدر يساعدك ويديك رأي محايد عن الذهب كاستثمار مقارنة بالكلام التسويقي اللي هتسمعه من التجار اللي بيبيعوا المعادن الثمينة أو من الناس حواليك بشكل عام. بمساعدة المستشار المالي، هتقدر تحدد إذا كان للذهب دور مهم في محفظتك الاستثمارية في وقت معين أو لا.

هل يجب عليك الاستثمار في الذهب؟

ودلوقتي نيجي للسؤال اللي أكيد بتفكر فيه من أول ما بدأت تقرأ المقال واللي هنختم بيه كلامنا النهارده. هل الأفضل ليك إنك تستثمر في الذهب؟

لو انت قلقان من التضخم أو التقلبات الاقتصادية اللي بتحصل من وقت للتاني، الذهب ممكن يكون ملاذ آمن للاستثمار. رغم إنه في الأجل القصير ممكن يكون متقلب زي الأسهم، لكنه على المدى الطويل بيحافظ على قيمته بشكل ملحوظ. والأكيد إن القرار مبني على حسب تفضيلاتك ومستوى تحملك للمخاطر، ممكن تختار الاستثمار في الذهب المادي، أو أسهم الذهب، أو صناديق الاستثمار في الذهب. وبغض النظر عن شكل الذهب اللي هتستثمر فيه، معظم المستشارين بينصحوا إنك ما تستثمرش أكتر من 10% من محفظتك في الذهب.

أي نوع من الاستثمار فيه مخاطر، والذهب مش استثناء. لكن سوق الذهب الفريد مش سهل التعامل معاه وبيحتاج وقت طويل للتعلم. عشان كده صناديق الاستثمار في الذهب هي الاختيار الأكثر أمانًا لمعظم المستثمرين اللي عايزين يضيفوا استقرار الذهب لمحافظهم.