كلنا عندنا خبرة كبيرة في شعور التوتر اللي بنحس بيه أول ما تحصل حاجة غير متوقعة متعلقة بالفلوس، زي إن العربية تعطل عُطل مُكلف أو فاتورة جه وقت تسديدها والمبلغ كبير، في الوقت ده بتفضل تسأل نفسك: هعمل ايه وازاي هدفع المبالغ دي؟ بس تعرف معنى انه يكون شعورك في المواقف دي مجرد إنزعاج مش حالة من القلق والتوتر؟ ده معناه إنك حياتك فيها نسبة كبيرة من الحرية المالية!
الحرية المالية هدف كلنا بنطمح ليه، بس جزء بسيط مننا اللي بيقدر يوصله. الحرية المالية بتعبر عن امتلاكك للموارد المالية اللي بتضمن ليك حياة خالية نوعاً ما من الضغوط المالية المستمرة واللي بيعيشها معظمنا في حياته. وفي مقال النهارده هنتناقش عن كل ما يخص الحرية المالية والعادات اللي هتساعدك توصل ليها وتحققها.
ما هي الحرية المالية؟
الحرية المالية هي قدرتك على إنك تاخد قرارات حياتك المتعلقة بالأمور المادية بسلاسة وبدون توتر؛ والسبب إنك بتكون مُستعد مالياً لأي عواقب الحياة ممكن ترميها في طريقك. مفيش ديون، ومأمن نفسك بفلوس في البنك، وبتستثمر للمستقبل.
بمعنى تاني، أنت اللي بتتحكم في الفلوس مش العكس. لما يكون عندك حرية مالية، بيكون عندك اختيارات، ومش هتضطر تقلق لو كان حسابك البنكي مش هيقدر يغطي تكلفة تصليح السيارة؛ لأن عندك طرق تانية مأمن نفسك بيها مادياً.
كيف تصل إلى الحرية المالية؟
الطريق إلى الحرية المالية مختلف عن فكرة تجهيز خطة عشان تكون غني! الحرية المالية مش معناها إنك تبقى "حر" من مسئولية إدارة فلوسك بشكل جيد. بالعكس تمامًا. السيطرة الكاملة على فلوسك هي نتيجة شغل وتعب، وتضحيات بمرور الوقت. وكل المجهود ده يستاهل وده اللي هتفهمه مع الوقت!
ودلوقتي هنتكلم عن بعض العادات أو الخطوات اللي ممكن تبدأ بيها طريقك لتحقيق الحرية المالية من النهاردة:
9 عادات للوصول إلى الحرية المالية
1- حدد أهداف الحياة الخاصة بيك
إيه هي الحرية المالية بالنسبة ليك؟ كلنا عندنا رغبة عامة نوصلها، لكن ده هدف عام جداً. لازم تحدد بالضبط الأرقام اللي عايز تحققها والمواعيد اللي عايز توصلها فيها. وكل ما كانت أهدافك محددة أكتر، كل ما زادت فرص تحقيقها.
اكتب الـ 3 أهداف دول:
- أسلوب حياتك اللي انت محتاجة
- الرقم اللي المفروض يكون في حسابك البنكي عشان تحقق ده.
- السن اللي لازم توصل فيه للمبلغ ده.
بعد كده، احسب بالعكس من السن اللي حددته كميعاد نهائي توصل فيه لأهدافك لسنك دلوقتي، وقسّم أهدافك المالية على فترات منتظمة بين التاريخين. كمان اكتب كل المبالغ والمواعيد النهائية بدقة وحط ورقة الأهداف دي قدامك دايماً.
2- اتعلم ازاي تحدد ميزانية لنفسك
مفيش حد بيكسب بطولة كبيرة بالصدفة، وبرضه مش هتوصل للحرية المالية بالصدفة. لو مفيش عندك خطة واضحة لفلوسك، هتكتشف في نهاية كل شهر إنك مش بتتقدم وإنك بتسأل نفسك "الفلوس خلصت في ايه وإزاي؟!" صعب الوصول للحرية المالية إذا كنت غير ملتزم بميزانية محددة، بالتالي محتاج في بداية كل شهر تحدد وتراقب كل جنيه هتتعامل معاه ازاي والالتزامات اللي بتصرف فيها فلوسك كل شهر.
ولو لقيت نفسك بتصرف أكتر أو أقل في حاجات معينة؟ تقدر دايمًا تعدل المبلغ في الجزئيات دي. محتاج تعرف أن حتى بعد وصولك للحرية المالية، انت محتاج تعمل ميزانية مختلفة لنفسك كل شهر. فمهما كان معاك فلوس، لازم يكون عندك خطة. الميزانية هي أول خطوة لبناء ثروة. ابدأ في وضع ميزانية بثقة واتحكم في فلوسك من النهاردة.
3- سيطر على فكرة الديون قد ما تقدر
إذا كان عندك ديون زي بطاقات الائتمان، أو قروض، زي قرض التمويل العقاري، أو قرض السيارة، جه الوقت إنك تقلل من كل الأفعال دي؛ وده لإنك لو كل شهر بتدفع من الراتب مبالغ كبيرة لتسديد الديون أو القروض، أو حتى أقساط بطاقات الائتمان، هيكون طريق الوصول للحرية المالية صعب.
دخلك هو أقوى أداة عندك لبناء الثروة. ومش هتقدر توصل لأهدافك المالية لو الفلوس اللي بتكمّل معاك الشهر هي فلوس قليلة بعد ما تدفع فواتير بطاقات الائتمان وأقساط قرض التمويل العقاري أو غيرها من القروض. تسديد ديونك بيساعدك تبني أساس لثروة تدوم سنين.
جاهز تبدأ رحلتك للتخلص من الديون؟ ابدأ من النهاردة وماتضيعش وقت أكتر.
4- اختار تخصصك المهني بذكاء
زي ما اتكلمنا، أكبر آداة لبناء ثروتك هي الدخل أو الراتب الشهري. وبالتالي حاول تلاقي وظيفة بتحبها وفي نفس الوقت تحقق ليك الآمان المالي وتساعدك تكمل في طريقك للوصول إلى الحرية المالية. وانت بتحدد تخصصك المهني، محتاج تسأل نفسك الأسئلة دي:
- عايز تكون فين كمان 10 سنين؟ وهل الوظيفة دي مناسبة لأهدافك في الحياة بشكل عام؟
- هل الوظيفة دي فيها فرصة لزيادة الدخل؟ حتى إذا بدأت فيها براتب قليل، لو فيها فرصة ان الدخل يزيد فيما بعد، فهي وظيفة تكمل فيها.
- هل الشغل ده فيه فرصة للترقية والتطور المهني؟
- بتحب الشغل ده؟ حاول ماتقضيش حياتك في وظيفة بتكرهها، حاول تلاقي وظيفة تطور فيها مهاراتك وقدراتك.
اختيارك المهني ممكن يؤثر بشكل كبير على خطتك المالية على المدى الطويل، احكم على الموضوع بجدية.
